Вкупно 160 македонски државјани ќе се вратат денеска со организиран лет од Брисел и Париз.
Како што соопшти МНР, ова е 11. специјален лет откако на 27 март МНР го организираше првиот чартер лет од Ла Валета на Малта за враќање во земјата на граѓаните затекнати во странство поради пандемијата на ковед-19.
За вечерва се најавува и организирано враќање на 35 наши државјани од Абу Даби преку аеродромот во Софија.
„Упатуваме благодарност за солидарноста и соработката до сите земји кои им помогнале на нашите граѓани, вклучително и на Владата на Република Бугарија за вечерашниот лет од Абу Даби до Софија, на кој се наоѓаат и 35 македонски граѓани“,
наведуваат од МНР.
На летот кон Белгија и Франција, во соработка со амбасадите на овие земји, денеска е помогнато и на 71 странски државјани да се вратат во своите земји.
До овој момент, вкупниот број на вратени македонски граѓани во организација на МНР, а во тесна соработка со Генералниот секретаријат на Владата, МВР и Министерството за здравство, изнесува 2 704.
„Од нив. 1 745 се вратиле со специјалните чартер-летови на авиопревозникот ‘Визер’, а 214 со хуманитарни конвои, додека пак на 526 граѓани (најчесто затекнати на други континенти), во соработка со министерствата за надворешни работи на повеќе држави и во координација со нашите дипломатско-конзуларни претставништва им беше обезбедено непречено да транзитираат низ неколку држави со цел да дојдат до финалната дестинација, аеродромите во Софија, Солун, Истанбул и Тирана“,
наведуваат од МНР.