Како што е наведено на фејсбук-страницата на ЦУК, само во последните три дена, од 29 до 31 јули се примени 4 635 повици или околу 1 540 повици дневно.
На единствениот телефонски број за повици при итни ситуации „112“ од 11 февруари па сè до денеска се примени вкупно 240 253 повици, информира денеска Центарот за управување со кризи (ЦУК). Тоа, додаваат од Центарот, се во просек 1 404 повици дневно.
Во февруари, кога се примаа повици само од територијата на Скопје, се примени 11 321 повици, а просекот за овој период е по околу 629 повици дневно.
Од март, пак, во Секторот 112 при ЦУК, кога се започна со прием на повици од цела територија на државата се примени 55 767 повици и просекот за март е 1 799 повици дневно.
„Во месец април се примени 42 100 повици или во просек 1 403 повици дневно. Во месец мај се примени 44 839 повици или во просек 1 446 повици дневно. Во месец јуни се примени 41 759 повици или во просек 1 392 повици дневно. Во месец јули се примени 44 467 повици или во просек повици 1 434 дневно“,
посочуваат од ЦУК.
Како што е наведено на фејсбук-страницата на ЦУК, во последните три дена, од 29 до 31 јули се примени 4 635 повици или околу 1 540 повици дневно.
Европскиот број за итни случаи 112 од февруари годинава се пушти во употреба и за македонските граѓани, кои во итен случај, со вртење на бројот 112, во најкраток можен рок ќе ги добијат услугите на полицијата, итната медицинска помош или противпожарната бригада, од каде било во државата.
Итниот број 112 е предвиден како додаток на постојните броеви за итни случаи и како едношалтерски сервис за сите потреби на граѓаните.
Воспоставувањето на целиот систем на бројот 112 за итни случаи беше поддржано од Европската Унија со 2,3 милиони евра, вклучувајќи хардвер, софтвер, како и стручна помош, а директен корисник е Центарот за управување со кризи.