Претседателката на Бугарија нагласила дека ова се европски критериуми за членство, а не бугарски барања, повторувајќи дека за да започне преговори, земјава мора да ги исполни обврските за вклучување на Бугарите во Уставот
Бугарија очекува Северна Македонија да ги исполни европските критериуми за членство во Европската Унија, односно да го исполни францускиот предлог од 2022 година, кој самата го потпиша, а кој стана паневропски став за пристапување на земјата во ЕУ. Ова го порачала претседателката на Бугарија, Илијана Јотова, за време на денешната средба со претседателката Гордана Сиљановска-Давкова на маргините на Самитот на ПСЈИЕ.
Јотова нагласила дека ова се европски критериуми за членство, а не бугарски барања, повторувајќи дека за да започне преговори, земјава мора да ги исполни обврските за вклучување на Бугарите во Уставот. Инсистирала на почитување на правата на македонските Бугари и ставање крај на, како што рекла, говорот на омраза во земјава.
Претходно денеска, претседателката Гордана Сиљановска-Давкова, рече дека од средбата со Јотова јасно е дека уставните измени не се единствениот услов за тргање на ветото и почеток на преговорите на земјава со ЕУ.
„Јас и мојот колега Муцунски сакавме да ги слушнеме нивните позиции. На обајцата ни стана јасно – не се во прашање само уставните измени, туку се во прашање и други барања поврзани со протоколите што произлегуваат од работата на исторската комисија. Толку можам засега да кажам“,
рече претседателката по средбата со својата бугарска колешка.