Покрај сефот во вредност од 12 илјади денари, осомничениот 23-годишник заедно со уште три лица, како што соопштија од ОЈО Скопје, го одзеле дневниот промет на маркетот во износ од 28 илјади денари и цигари вредни 45 илјади денари
Скопското обвинителство покрена постапка и предложи притвор за 23-годишник кој е осомничен дека ноќта меѓу 31 март и 1 април заедно со уште три лица провалил во затворен маркет во Скопје и одзел метален сеф.
Покрај сефот во вредност од 12 илјади денари, четворицата, како што соопштија од ОЈО Скопје, го одзеле дневниот промет на маркетот во износ од 28 илјади денари и цигари вредни 45 илјади денари.
Изнесувајќи детали за настанот, од ОЈО Скопје посочуваат дека четворицата со возило пристигнале пред маркетот на улица „Востаничка“ во Скопје и со хебла и клешти се обиделе да ја обијат вратата на објектот, но не успеале.
„Еден од сторителите го стартувал возилото и удрил со задниот дел кршејќи ги двете лизгачки врати. Потоа заедно со другите осомничени ги демонтирале и ги поставиле покрај влезот од маркетот. Преку така направениот отвор сега осомничениот заедно со другите лица влегол во просторијата наменета за вработени, од каде што го одзеле металниот сеф со дневен промет и цигарите, па заминале во непознат правец“,
велат од Обвинителството.
Дваесет и тригодишникот е осомничен за кривично дело тешка кражба по член 236 став 1 точка 1 од Кривичниот законик, а полицијата работи на откривање на другите учесници во стореното дело.