Обвинителството од Гостивар бара парична казна за управителот на угостителскиот објект во кој пред два дена се служеше храна и покрај мерката на Владата за затворање на рестораните и барови.
„Обвинетиот на 16 март послужувал храна на гостин седнат на маса во внатрешноста на неговиот угостителски објект, умислено не постапувајќи според писмената наредба на Министерството за здравство со која се определуваат мерки за спречување или сузбивање на пандемијата на опасна заразна болест – коронавирус“,
соопштија од Обвинителството.
Вчера, пак, беше изречена првата казна за лице кое не ја почитуваше мерката за задолжителна самоизолација. Со 2 500 евра беше казнет жител на Дебриште кој се вратил од Германија, не сакал да ја потпише наредбата за самоизолација и не ја почитувал мерката.