Четворица републиканци, како што пренесува Би-би-си, им се придружија на своите колеги од таборот на демократите за во тесно гласање синоќа со 50 гласа „за“ и 48 „против“ да ја усвојат резолуцијата. Мерката претходно овој месец беше усвоена од Претставничкиот дом на Конгресот на САД
Сепак, како што забележуваат медиумите, резолуцијата во голема мера е симболична, бидејќи, иако усвоена од двата дома на Конгресот, таа нема да биде доставена на разгледување до Трамп и нема сила на закон
Американскиот претседател вчера вечер ја критикуваше резолуцијата, нарекувајќи ја лошо темпирана и бесмислена
Сенатот на Соединетите Амрикански Држави (САД), каде мнозинството го имаат републиканците, усвои резолуција со кој му се наложува на претседателот на државата Доналд Трамп да ја запре војната со Иран или да бара одобрение од Конгресот пред да продолжи со нови воени дејствија, јавуваат светските медиуми.
Група републиканци, како што пренесува Би-би-си, им се придружија на своите колеги од таборот на демократите за во тесно гласање синоќа со 50 гласа „за“ и 48 „против“ да ја усвојат резолуцијата. Мерката претходно овој месец беше усвоена од Претставничкиот дом на Конгресот на САД.
Сепак, како што забележуваат медиумите, резолуцијата во голема мера е симболична, бидејќи, иако усвоена од двата дома на Конгресот, таа нема да биде доставена на разгледување до Трамп и нема сила на закон.
Инаку, разгледувањето и гласањето за ова прашање дојде откако републиканците во Конгресот чија поддршка ја има американскиот претседател, изразија скептицизам во однос на мировниот план што Трамп го договори со Иран за ставање крај на непопуларниот конфликт кој влегува во петтиот месец откако израелско-амерканските сили ја нападнаа земјата на Блискиот Исток.
Американскиот претседател вчера вечер ја критикуваше резолуцијата, нарекувајќи ја лошо темпирана и бесмислена, пренесуваат светските медиуми.
„Значи, го држам Иран на јаже, подготвен е да падне на есен…а Сенатот на САД одлучува да има лошо темпирано и бесмислено гласање во врска со Законот за воени овластувања…Овие сенатори ми ја отежнаа работата, но јас ќе ја завршам, на еден или на други начин, бидејќи секогаш ја заршувам“,
напиша Трамп на својата социјална платформа Трут соушл (Truth Social).
Инаку, ова првпат двата дома на Конгресот на САД да одобрат резолуција со која му се наложува на претседателот на државата да прекине воена акција, по Резолуцијата за воени овластувања донесена во 1973 година.
Со документот се изразува чувството и волјата на Конгресот да упатат предупредување до претседателот во врска со прашањето за војната со Иран, но за разлика од другите форми на законодавно одлучување на Конгресот, оваа резолуција ја нема тежината за да биде испратена на потпис кај шефот на државата. Британскиот национален сервис потсетува дека Трамп во 2019 година, за време на својот прв мандат стави вето на заедничката резолуција со која се повикуваше на повлекување на вооружените сили на САД од дејствија поврзани со граѓанската војна во Јемен.
Аналитичарката за Блискиот Исток, Лаура Блуменфелд, резолуцијата ја оценува повеќе како шлаканица по рацете на Трамп, отколку ставање лисици, посочувајќи дека таа не е правнообврзувачка.
Сепак, во изјава за Би-би-си, таа вели дека документот ги одразува чувствата на американскиот народ во врска со војната на САД против Иран.
Усвојувањето на резолуцијата и од Претставничкиот дом и од Сенатот, се смета за значајно, затоа што го зголемува притисокот врз Белата куќа да најде решение за ставање крај на војната со Иран, која е непопуларна кај јавноста во земјата, особено поради зголемувањето на цените горивата што таа ги предизвика.
Резолуцијата претходно овој месец беше усвоена од Преставничкиот дом на САД, каде четворица републиканци им се придружија на демократите за да ја одобрат со 215 гласа „за“, наспроти 208 „против“.
Официјален претставник на Белата куќа за медиумите изјави дека дека со прекинот на огнот договорен на 7 април, нема непријателства од кои би се повлекле американските сили. Тој, додал дека документот бил усвоен само затоа што двајца републикански сенатори – Мич Меконел и Дејв Мекормик биле отсутни.
Инаку, четворицата републикански сенатори кои им се придружија на демократите во Сенатот и ја поддржаа резолуцијата се Ренд Пол, Лиза Мурковски, Сузан Колинс и Бил Касиди.
Демократскиот сенатор Џон Фетерман беше единствениот член на неговата партија кој гласаше против неа.
Резулатот од гласање дополнително се толкува како најнов знак за поделба меѓу републиканските колеги на Трамп пред среднорочните избори во ноември, кои ќе одредат дали партијата може да ги задржи своите мали мнозинства во двата дома на Конгресот.
Некои републиканци неодамна му се спротивставија на претседателот, вклучително и со отфрлање на неговите планови за создавање фонд за „противоружување“ од 1,8 милијарди долари и одобрување на помошта за Украина.
Гласањето во вторник беше десетти пат демократите во Сенатот да изнудат гласање за воени овластувања од почетокот на војната.
Тоа дојде истиот ден кога Пентагон побара од Конгресот околу 80 милијарди долари, од кои поголемиот дел се наменети за плаќање на војната со Иран. Инаку, федералниот закон на САД бара одобрение од Конгресот за да се продолжат воените дејствија повеќе од 60 дена.
Во моментов, САД и Иран се согласија да го продолжат прекинот на огнот договорен на 7 април за 60 дена, период во кој ќе работат на деталите за ставање крај на непријателствата, соглансо меморандумот за разбирање што претседателите на САД и на Иран одвоено го потпишаа минатата недела. Едно од најтешките прашањаоколу кое треба да се договорат Вашингтон и Техеран, а за кое во моментов немаат заеднички став, е прекувањето на нуклеарната програма на Иран.