Обвинителството и МВР ќе ја информираат јавноста веднаш штом се создадат услови кои нема да ја нарушат постапката, велат од ЈОРСМ. Оттаму посочуваат дека сите шпекулации кои имаат за цел да ја компромитираат истрагата во овој момент ќе бидат најостро санкционирани
Јавен обвинител од Основниот кривичен суд Скопје побарал мерка притвор од 48 часа за тројца од петтемина приведени во врска со исчезнувањето на 14-годишната Вања Ѓорчевска од Скопје.
Како што соопштуваат од Обвинителството, мерката била побарана со цел да се обезбеди нивно присуство до целосно расчистување на настанот.
„Во текот на целиот ден се преземаат дејствија за обезбедување докази. За тројца од петтемина приведени во текот на вчерашниот ден, јавен обвинител до Основниот кривичен суд Скопје достави предлог за определување 48-часовен притвор со цел да биде обезбедено нивното присуство до целосно расчистување на настанот. Јавното обвинителство и МВР ќе ја информираат јавноста веднаш штом се создадат услови кои нема да ја нарушат постапката. Сите шпекулации кои имаат за цел да ја компромитираат истрагата во овој момент ќе бидат најостро санкционирани“,
соопштија попладнево од Обвинителството.
Министерот за внатрешни работи Оливер Спасовски вчера по првпат излезе со детали од потрагата по 14-годишната Вања Ѓорчевска од Скопје и соопшти дека полицијата привела пет лица во врска со исчезнувањето на девојчето.
Тој, во интерес на истрагата, одби да открива повеќе детали и повтори дека интензивно се работи на расчистување на случајот.
„Синоќа доцна во ноќта се работеше исто така интензивно, имаме приведено 5 лица и обезбедено едно возило со коишто се продолжува понатаму работењето. Тоа е нешто плус што го презедовме во однос на сето она како доказ или трага, со цел да дојдеме до целосно расчистување на овој случај“,
изјави вчера Спасовски.
Според него, предвременото соопштување детали прави проблеми за истрагата.
Вања исчезна пред 7 дена, во понеделникот, кога околу 7:30 часот излегла од својот дом во близина на Градскиот парк за да оди на училиште. Мајката го пријавила исчезнувањето еден час подоцна, откако класниот раководител ѝ јавил дека девојчето не е стигнато на училиште.
Во потрагата се вклучи и Интерпол, a МВР формира посебен штаб.
Како што пред два дена изјави и министерот Спасовски, се пребарувале и реката Вардар и подрумски простории, а се работело и на прибирање податоци од црквите и манастирите во близина на Скопје.
„Значи, се пребаруваше и речното корито на Вардар, се пребаруваа и сите подрумски простории, не само во околината, туку и малку пошироко. Се работеше на пребарување, односно на добивање податоци и информации од црквите и манастирите коишто се во близина на Скопје. Една опсежна активност и тука нема да се застане, интензивно работиме“,
изјави министерот за внатрешни работи.