На прашањето дали смета дека зад инцидентот во Бањска стои Белград, тој рече дека тогаш јасно било ставено до знаење дека КФОР ги штити сите луѓе на Косово, вклучително и оние во северниот дел, но нагласува дека потоа Србија го сменила шефот на разузнавачката служба, но и ги повлекла војниците од границата
САД се многу загрижени поради одлуката на косовската влада да не дозволи користење на динарот, вели американскиот помошник државен секретар Џејмс О’Брајан во интервју за албанскиот сервис на „Гласот на Америка“ коментирајќи ја новата регулатива на Централната банка на Косово со која еврото станува единствената валута за плаќање во Косово.
Вели дека и покрај предупредувањата на Вашингтон, косовската влада не отстапила од одлуката и почнала да ја спроведува.
Со тоа О‘Брајан вели дека косовската влада го доведува во прашање партнерството со САД.
„Јас не упатувам нејасни закани во јавноста. Би рекол дека ако не не третираат како партнер, нема да ја третираме ниту владата на Косово како партнер“.
вели помошник државниот секретар на САД.
О‘Брајан вели дека веднаш биле детектирани сите проблеми кои настанале по објавувањето на одлуката за повлекување на динарот, но посочува дека владата на Косово продолжила со спроведувањето,.
„Ова не е форма на ефективно владеење. Ние сме многу загрижени бидејќи тоа ја покажува неспособноста на владата да им служи на граѓаните, но и на партнерството. Да се биде дел од Европа денес значи решавање на прашањата преку дијалог со ефективно планирање и предупредување. Оваа одлука е објавена набрзина, без предупредување и без обид да се искористат постоечките механизми за да се најдат одговори за сите проблеми кои би можеле да се појават“,
вели О‘Брајан.
Според новата регулатива на Централната банка на Косово, еврото станува единствената валута за плаќање во Косово откако меѓународната заедница повика оваа одлука да биде одложена за транзициски период. Но, Централната банка на Косово даде само тримесечен период за едукација и информирање на граѓаните.
О‘Брајан смета дека оваа одлука треба да се повлече, а потоа да се бара решение на проблемот, како што според него тоа го прават современите европски држави.
„Луѓето треба да знаат како ќе си ги платат сметките. Кога го прочитав соопштението на Централната банка, не пишува дека ќе се дозволи користење на динарот. Вели дека ќе биде понудена алтернатива. Тоа мораше да се направи пред да се спроведе одлуката во соработка со засегнатите заедници и соседите засегнати од одлуката, како и со Европската Унија и со нас. Значи, веднаш треба да го прекинат ова и потоа да работат на решавање на конкретниот проблем што сакаат да го решат, исто како што тоа го прават современите европски држави“,
вели О‘Брајан.
На оваа тема О‘Брајан разговарал и со косовскиот премиер Албин Курти во периодот на објавување на одлуката, а имале и кратко разговори потоа.
„Тој ја разбра загриженоста. Вети дека ќе работи на ова. Но, јасно одлучи да ја одобри одлуката. Ако не нè третира како партнер, се поставува прашањето дали оваа влада можеме да ја сметаме за партнер“,
рече О‘Брајан.
На прашањето дали смета дека зад инцидентот во Бањска стои Белград, тој рече дека тогаш јасно било ставено до знаење дека КФОР ги штити сите луѓе на Косово, вклучително и оние во северниот дел, но нагласува дека потоа Србија го сменила шефот на разузнавачката служба, но и ги повлекла војниците од границата
„Ги повикавме двете влади да бидат транспарентни и отворени со КФОР. Сакам да нагласам дека Србија го смени шефот на разузнавачката служба, кој беше вклучен во тоа. Тие ги уапсија и се согласија да ги гонат лицата директно одговорни за инцидентот во Бањска, а српските војници се повлекоа од областа во близина на границата. Сите овие чекори се преземени по инцидентот во Бањска, односно беа преземени чекори за де факто имплементирање со царината и регистарските таблички“,
рече тој.
О‘Брајан вели дека тоа биле важни чекори кои дошле како резултат на одговорот и посветеноста на дијалогот.
„Сакаме посветеност, да работиме на практични решенија за овие проблеми, а не да преземаме еднострани мерки за личен интерес кои ги загрижуваат и вашите граѓани и вашите партнери“,
изјави О‘Брајан.
Европската Унија пред две недели повика на воведување доволно долг преоден рок за примена на одлуката на Централната банка во Приштина за забрана на користењето други валути во Косово, освен еврото, со цел да се најде решение за ова прашање по пат на преговори.
За односите меѓу Косово и Србија по охридските договори, О’Брајан вели дека нивното спроведување и припаѓа на секоја страна да преземе свои активности, безусловно од другата страна. Србија, според него, презела два важни чекори кон де факто признавањето на Косово, а за пример ги посочува имплементирањето на регистарските таблички и царинските документи.
„Минатата пролет во Охрид двете страни се договорија за низа акции што треба да ги преземат една по друга, секоја без разлика на дејствијата на другата страна. И сега се создадени околности кои им овозможуваат на двете страни да се обвинуваат една со друга, наместо да работат за нивните жители да бидат слободни и понапредни. Сакам да нагласам дека Србија од октомври презеде два важни чекори кон нормализација или де факто признавање на Косово, преку имплементација на автомобилски регистарски таблички и царински документи. Тоа се цели кои долго време се бараа и се реализираа и верувам дека има и други работи што ќе се случат од овој аспект, ако се вратиме на дијалогот наместо да дејствуваме надвор од него, како што одлучи да направи косовската влада“,
вели тој.