Од Букурешт до Софија и генерално на Балканот голем број влади не успеаја да ги решат ризиците од згради што лесно може да се урнат при земјотрес. Тоа го наведува „Њујорк тајмс“ во написот под наслов „Лекции од албанскиот земјотрес – Балканот не е подготвен за голем земјотрес“.
Весникот потсетува на земјотресот од 26 ноември во Албанија со јачина од 6,4 степени, кога загинаа повеќе од 50 луѓе, повредени беа стотици, а остави илјадници бездомници.
Трагедијата испраќа јасно предупредување до регион кој беше погоден од многу посилни земјотреси во минатото, а експертите велат дека балканските земји не се подготвени за следниот голем земјотрес. Според нив, властите во регионот го охрабрија градежниот бум од 90-тите години преку преминот од комунизам во капитализам, при што безбедносните стандарди честопати се менуваат од потрагата по брз профит. Како резултат, милиони луѓе живеат во домови кои е малку веројатно дека ќе издржат голем земјотрес, нагласува весникот.
Во написот е цитиран Метју Сумбасаку, основач на „Re:Rise“ – првата романска невладина организација специјализирана за намалување на сеизмички ризик – кој вели дека има 349 градби со висок ризик само во Букурешт кои веројатно ќе се урнат при силен земјотрес.
Повеќето од нив се станбени комплекси. Стотици други згради би претрпеле голема штета.
„Њујорк тајмс“ потсетува на двата катастрофални земјотреси од 20 век во планината Вранчеа, источна Романија – во 1940 година со јачина од 7,4 степени и на 4 март 1977 година со јачина од 7,2 степени. Вториот земјотрес уништи повеќе од 30 високи згради во Букурешт, при што загинаа околу 1.580 луѓе, а скоро 11.000 беа повредени.
Во статијата се потсетува на земјотресот во бугарскиот град Стражица во 1986 година со јачина од 5,7 степени, кој предизвика сериозно уништување и остави илјадници бездомници.
Експерт од софискиот Универзитет за архитектура, градежништво и геодезија (УАЦЕГ) вели дека Бугарија е можеби подобро подготвена од некои соседи, но загриженост предизвикуваат новоизградените згради.
Според него, приземните катови на некои од новите згради се претворени во продавници и на покривите е додаден дополнителен кат, што претставува ризик при земјотрес.
Во телефонско интервју за весникот Питер Павлов, директор на Националниот центар за сеизмичко инженерство при УСЕЦГ, повика да се постави национална сеизмичка лабораторија во Бугарија со задача да ја провери еластичноста на зградите при земјотреси.
Написот на „Њујорк тајмс“ ја нагласува историјата на земјотресите на јадранскиот брег од Хрватска преку Црна Гора до Албанија и во денешна Северна Македонија.