Познат готвач, чија ќерка е девојка на фудбалерот на Реал Мадрид, Давид Алаба, и поранешен полицаец, кој некогаш имал задача да ги штити еврејските заедници од терористички напади, се меѓу најновите личности што се поврзани со осуетениот заговор за државен удар во Германија
Истрагата сè уште трае, а се очекуваат и дополнителни апсења
Деталите што се појавија по најголемата германска полициска операција против десничарскиот екстремизам сугерираат дека осомничените можеби биле известени за рациите, во кои учествуваа над 3 000 полицајци на повеќе од 150 адреси низ Германија, Австрија и Италија, кога беа уапсени 25 лица, пренесува РТС повикувајќи се на германски и австриски медиуми.
До петок бројот на осомничени се зголеми на 54, а се очекуваат уште апсења. Оружје е пронајдено на повеќе од 50 локации, соопшти германското Федерално биро за криминални истраги.
Френк Хепнер, готвач од Минхен, кој беше уапсен во средата во хотел со пет ѕвезди во австрискиот ски-центар Кицбил каде што работел, наводно бил член на командниот штаб на воениот огранок на терористичката група, одговорен за регрутирање нови членови, набавка на оружје и друга опрема, како и изградба на комуникациска и ИТ-структура.
Тој, исто така, имал задача да управува со мензата каде што ќе се хранат припадниците на таканаречената „нова германска армија“.
Австрискиот дневен весник „Пресе“, повикувајќи се на истражители, вели дека Хепнер (62), исто така, требало да биде личен готвач на Хајнрих XIII, принцот од Ројс, откако би бил поставен за крал.
Се вели дека Хепнер ѝ дал на групата пари, прибор за готвење, комбе за кампирање и генератор за итни случаи.
Дваесет и осумгодишната ќерка на Хепнер, Шалимар, е во врска со Давид Алаба, професионален фудбалер кој игра за Реал Мадрид и капитен на австриската репрезентација.
Алаба не одговорил на барањата за коментар, според германските медиуми кои се обиделе да стапат во контакт со него.
Меѓу другите за кои се вели дека биле дел од групата е и поранешен полицаец Михаел Фрич кој некогаш имал задача да ги заштити еврејските заедници од терористички напади. Тој беше уапсен со својата партнерка Мелани Ритер во близина на Хановер во северна Германија.
Фрич (58) беше суспендиран од должноста во 2020 година, а подоцна беше отпуштен откако се појави на протести организирани за негирање на ковид-пандемијата.
Подоцна стана парламентарен кандидат на Ди бејсис, политичка партија на движењето „Куерденкер“ кое негира дека постои ковид. Неговата жалба пред судот за отказот сè уште е без епилог.
Екстремно десничарската Алтернатива за Германија продолжи да се дистанцира од својата поранешна членка Биргит Малсак-Винкеман, судијка која беше уапсена во својот дом во западен Берлин бидејќи, наводно, била еден од клучните заговорници. По државниот удар беше планирано таа да биде министерка за правда.
Имаше широко распространети повици за ревизија на пристапот до Рајхстагот. Малсак-Винкеман, која како поранешна пратеничка имала пристап до зградата на парламентот, наводно им дала на членовите на воениот огранок на групата важни логистички информации за тоа како да влезат во Бундестагот.
„Обновена контрола на пристапот до Бундестагот од страна на поранешните пратеници на АфД е неопходна по откритијата во врска со Малсак-Винкеман“,
рече Константин Куле, заменик-парламентарен лидер на либералите, повикувајќи ги безбедносните сили да му оневозможат пристап на секој што го сметаат за потенцијална опасност по безбедноста.
Степенот до кој групата имала капацитет да ги претвори фантазиите за моќ во реалност останува предмет на жестока дебата.
Според весникот „Шпигел“, меѓу предметите запленети во рациите имало пиштоли со калибар од 9 милиметри, мечеви, ножеви, шок-пиштоли, борбени шлемови, опрема за ноќно гледање и оружје на полицајците кои биле меѓу осомничените.
Левичарскиот дневен весник „Тагесцајтунг“ објави дека истражителите пронашле „список за отстрел“ со 18 имиња и адреси на истакнати германски политичари и новинари кои групата можеби имала намера да ги таргетира.
Меѓу нив е и министерката за надворешни работи Аналена Бербок, заедно со уште шест пратеници во Бундестагот и тројца телевизиски водители.