Грчкиот премиер и претседател на Нова демократија, Киријакос Мицотакис, рече дека на земјата ѝ претстојат три години без избори и додаде дека како што Грција во 2024 година е многу подобра споредбено со 2019 година, така во 2027 година ќе биде многу подобра од денес
Со 28,31 отсто од гласовите и седум места во Европскиот парламент, владејачката Нова демократија победи на вчерашните евроизбори во Грција.
Според резултатите објавени на веб-страницата на Европскиот парламент, Нова демократија добива 28,31 отсто и седум европратеници, а зад неа е Сириза со 14,92 отсто и четворица европратеници.
Трети се ПАСОК со 12,79 отсто и тројца европратеници, потоа следуваат Грчко решение од 9,30 отсто и двајца европратеници.
Комунистичката партија има 9,25 отсто и двајца европратеници и се пред Победа кои имаат 4,37 отсто и еден европратеник.
Доколку се анализираат резултатите од ланските парламентарни избори и евроизборите пред пет години, Нова демократија и Сириза вчера добија помала поддршка, додека пак радикално десничарската Грчко решение е четврта политичка сила во Грција, пренесува дописничката на МИА од Атина.
На европските избори во 2019 година Нова демократија доби 33 отсто од гласовите и осум европратеници, Сириза беше втора со 23,75 проценти и шест пратенички места, ПАСОК, Комунистичката партија и Златна зора имаа по двајца европратеници, а Грчко решение еден претставник во Европскиот Парламент.
На ланските парламентарни избори Нова демократија освои 40,56 отсто, Сириза доби 17,83 проценти, а ПАСОК 11,84 проценти, пренесува МИА.
Грчкиот премиер и претседател на Нова демократија, Киријакос Мицотакис, за резултатот од европските избори доцна синоќа призна дека партијата не ја постигнала целта што ја постави за европските избори.
„Нема да ја кријам вистината. Нашата партија не ја постигна целта што ја поставивме. Ниту ме интересираат аргументи дека разликата од втората партија е најголема во историјата на европските избори. Од самиот почеток знаевме дека овие избори ќе бидат многу тешки. Граѓаните што нè поддржаа во 2023 година знаеја дека сега не се избира влада и можеби поинаку се соочија со оваа битка. Предизборно, и покрај моите напори, недостигаше суштинско размислување за иднината на Европа и за позицијата на нашата земја во неа“,
рече Мицотакис.
Тој додаде дека на земјата ѝ претстојат три години без избори и додаде дека како што Грција во 2024 година е многу подобра споредбено со 2019 година така во 2027 година ќе биде многу подобра од денес.
Лидерот на Сириза, Стефанос Каселакис, истакна дека по ланскиот пораз сега партијата успеа разликата со Нова демократија од 23 да ја намали на 13 отсто.
„Грчкиот народ јасно ми даде време да изградам алтернативен владин предлог. Знам и целосно ја сфаќам важноста на оваа одговорност и токму тоа ќе го направам, како што кажавме и предизборно. Продолжуваме, се модернизираме, ќе поставиме лулки на знаење и понуда и ќе го инспирираме светот. А ова движење, кое и покрај неповолните услови издржа, отсега може да оди само нагоре. И јас сум многу горд за сите вас“,
рече Каселакис.