Може да се должи на британскиот сој, но и нанепочитување на мерките, собирања, гледате, времето е убаво, луѓето се надвор, не се почитуваат мерките, вели Филипче
Лабораторијата во МАНУ врши анализа на примероци и во текот на следната недела ќе се знае колкав процент од новите вкупно дијагностицирани со коронавирус го имаат британскиот сој.
Последната анализа беше дека се работи за околу 50 проценти, што е зголемување во однос на оние 20 отсто од претходно. Министерот за здравство Венко Филипче признава дека последниве денови има зголемување на бројот на регистрирани заразени во однос на направени тестови. Со епидемиолозите од Комисијата за заразни болести се прават анализи на што се должи тоа.
„Може да се должи на британскиот сој, но и на непочитување на мерките, на собирања. Гледате, времето е убаво, луѓето се надвор, не се почитуваат мерките“,
рече Филипче.
Тој рече дека не се исклучува можноста за некакви други мерки, на локално ниво или пошироко, но засега не се разгледува таква мерка.
Одговарајќи на новинарско прашање дали е возможно да се работи за реинфекција со британскиот сој, Филипче рече дека вакво нешто досега не е потврдено во науката, иако посочи на одредени студии кои се однесуваат на поедини случаи на повторно инфицирани лица откако еднаш веќе прележале ковид.
„Видовме многу сценарија, луѓе асимптоматски, со благи симптоми, со тешка форма на зараза, кои починаа, со многу антитела и без антитела, со антитела кои штитат и кои не штитат… Многу работи во врска со вирусот се непознати“,
изјави Филипче.