Со поддршка од Светската банка во земјава ќе почне имплементација на нов проект во здравството и социјалната наречен „Проект за брзо дејствување против ковид-19“ во вредност од околу 90 милиони евра.
Министерката за финансии Нина Ангеловска на Фејсбук објаснува дека проектот се состои од две компоненти – првата е набавка на медицинска опрема и материјали, реновирање здравствени установи, финансирање на здравствено осигурување за ранливи групи, и втората компонента е за поддршка на домаќинства, која вклучува трансфери за ранливи домаќинства и паричен надоместок за оние што ги изгубиле работните места како резултат на кризата.
Проектот е договорен на денешниот онлајн-состанок гувернерката на Народната банка Анита Ангеловска-Бежоска, вицепремиерката Радмила Шекеринска и вицепремиерката Мила Царовска со потпретседателот на Светска банка за Европа и Централна Азија Сирил Милер, во рамки на виртуелните Пролетни средби на ММФ и Светска банка.
Како што појаснуваат од Министерството финансии, новиот проект за брзо дејствување против последиците од кризата предизвикана од ковид-19, во износ од 90 милиони евра е за зајакнување на здравствените капацитети со обезбедување зголемување на капцитетите за тестирање, техничка експертиза, лабораториска опрема, заштитна опрема, медицински помошни материјали и опрема, реновирање здравствени установи, развој на системи за да се обезбеди навремено откривање случаи и следење контакт, во согласност со упатствата на Светската здравствена организација, како и финансирање на придонесот за здравствено осигурување за ранливи корисници. Втората компонента за поддршка на домаќинствата се однесува на обезбедување поддршка за трансфери за ранливи домаќинства погодени од последиците од коронавирусот и паричен надоместок за оние што ги изгубиле работните места како резултат на кризата.
Со ова вкупната поддршка од Светска банка за земјава за справување со коронакризата е 140 милиони евра, од кои 50 милиони се за финансиска поддршка во рамки на мерката субвенционирање од 14 500 денари по вработен.