Додека опозицијата му спрема интерпелација, вицепремиерот за борба против корупција вели дека ќе бидат разрешени сите функционери кај кои ќе бидат констатирани неправилности во работењето
Дефинирање што се подразбира под репрезентација и ограничување на трошоците на функционерите за таа намена, како и регулирање на користењето на службените возила… се дел од новите рестрикции за избраните и именувани функционери што ги најави денеска вицепремиерот за спречување корупција, за одржлив развој и за човечки ресурси Љупчо Николовски.
„Борбата против криминалот и корупцијата, како и стеснување на просторот и можностите за трошење на функционерите и натаму се врв во агендата на Владата“,
рече Николовски и нагласи дека неговиот кабинет во владина постапка предлага уредби за репрезентација, односно што колку може министер, заменик-министер или директор да потрошат за таа намена.
Тој додаде дека ќе бидат разрешени сите кај кои ќе бидат констатирани неправилности во работењето, како што тоа било случај и досега.
„Имаме разрешено повеќе директори, заменици-директори, претседатели на управни и на надзорни одбори… отколку што предложила Државната комисија за спречување на корупцијата, а за кои информациите стигнаа до мене директно од граѓаните и медиумите“,
рече Николовски.
Тој најави дека ќе се регулира и користењето на возила, со што ќе се придонесе за сѐ помалку непродуктивни трошења од страна на политичарите, што значи повеќе пари за граѓаните.
Николовски моментно е цел на интерпелација што ја поднесе ВМРО-ДПМНЕ против него и против министерот за правда Бојан Маричиќ, поради падот на земјава на листата на „Транспаренси“, во однос на индексот за борбата против корупцијата.
„Интерпелациите ги најавивме откако ги дознавме најлошите историски резултати на рангирањето на Македонија на 111. место на листата за корупција во светски размери, во друштво со Панама, Уганда, Занзибар и други земји. Сметаме дека оваа листа на ‘Транспаренси интернешнл’ треба многу да не загрижува бидејќи ја влошува економијата. Интерпелацијата е изработена врз основа на податоци од последните две години и цениме дека власта која што има и свои градоначалници и влада и претседател на држава ја носи одговорноста“,
изјави денеска пратеникот на ВМРО-ДПМНЕ, Антонио Милошоски.
Милошоски додаде дека очекува до крајот на овој месец претседателот на Собранието да ја стави интерпелацијата на дневен ред.
