Обвинителката Лиле Стефанова, на паузата од денешното рочиште, на барање на новинарите во неформален разговор објасни дека не се произнела во врска со кривичното дело злосторничко здружување и најави дека тоа ќе го направи во завршните зборови, кога ќе го повлече обвинението за ова кривично дело. Повлекувањето на ова кривично дело во оваа фаза, според Стефанова, нема да влијание на судскиот процес и трошоците за постапката. Судскиот процес за „Титаник“ продолжува да се одвива по вообичаениот тек бидејќи, освен за злосторничко здружување, обвинетите се товарат и за кривични дела поврзани со изборни нерегуларности
Глас, во смисла на барање за повлекување на ова кривично дело што им се става на товар на обвинетите поради застарување, не се слушна ниту од нивните бранители
Иако се очекуваше да биде своевиден лакмус за влијанието што ќе го имаат на високпрофилните случаи, новите измени на Кривичниот закон воопшто не беа споменати на денешното рочиште од судскиот процес за случајот „Титаник“.
Обвинетите во овој случај, кој беше прв што го отвори поранешното Специјално јавно обвинителство, освен за други се гонат и за кривичното дело злосторничко здружение, за кое со измени на КЗ затворските казни беа намалени. Поради ова, „Титаник“, во кој првообвинет е експремиерот и лидер на ВМРО-ДПМНЕ, а сега бегалец во Будимпешта, Никола Груевски, се најде на списокот на случаи на кои им се заканува застарување во однос на ова кривично дело.
На денешното рочиште не се слушна ниту збор за измените во Кривичниот законик, иако вакво нешто очекуваа новинарите кои беа присутни на денешното рочиште за „Титаник“ во Основниот кривичен суд Скопје.
Немаше произнесување од застапникот на обвинението, обвинителката на Основното јавно обвинителство за гонење на организираниот криминал и корупцијата (ОЈО ГОКК), Лиле Стефанова, во врска со кривичното дело злосторничко здружување ниту, пак, такво нешто беше побарано од одбраната на обвинетите.
Наместо тоа, главната расправа продолжи со распит на сведоци во врска со донациите за политичката партија ВМРО-ДПМНЕ. Најголем дел од нив останаа на исказите дадени на претходните рочиште, имајќи предвид дека предметот се суди по вторпат. Само двајца кажаа дека не се сеќаваат на дел од нивните претходни изјави.
Обвинителката Лиле Стефанова на паузата од денешното рочиште, на барање на новинарите, објасни дека не се произнела во врска кривичното дело злосторничко здружување и најави дека тоа ќе го направи во завршните зборови, кога ќе го повлече обвинението за ова кривично дело. Повлекувањето на ова кривично дело во оваа фаза, според Стефанова, нема влијание на судскиот процес и трошоците за постапката.
Судскиот процес за „Титаник“ продолжува да се одвива по вообичаениот тек бидејќи, освен за злосторничко здружување, обвинетите се товарат и за кривични дела поврзани со изборни нерегуларности.
На пример, првообвинетиот експремиер Никола Груевски, освен за злосторничко здружување, дело за кое со измените на КЗ и намалувањето на казните ова кривично дело му застарува, тој, како и други обвинети, се гони и за делата – злоупотреба на средства за изборната кампања и повреда на избирачкото право.
За кривичното дело не се произнесе ниту судот.
„Судот по службена должност не може да одлучи за повлекување на кривичното дело злосторничко здружување среде постапка, доколку обвинителство тоа не го побара“,
објасни Стефанова за новинарите.
Ниту одбраната не побара повлекување на кривичното дело злосторничко здружение
Глас, во смисла на барање за повлекување на ова кривично дело што им се става на товар на обвинетите, не се слушна ниту од нивните бранители.
Иако на паузата од денешното рочиште на скалите во судската зграда беше прашан од новинарите за изјава, коментар во врска со ова прашање не сакаше да даде адвокатот Насер Рауфи, кој по службена должност му е доделен од судот за бранител на Груевски.
Какви измени претрпе членот 394 од КЗ за злосторничко здружување
Покрај за злоупотребата на службената положба и овластувања, пратеници изгласаа промени и во ставовите од членот 394 – злосторничко здружување со што затворски казни во актуелниот закон „од една до десет години“ (став 1) и од „шест месеци до пет години“ (став 2) се намалуваат до три (став 1) односно до две години (став 2).
- Власта по брза постапка ќе ги намалува казните за злоупотреба на службената положба и злосторничко здружување
- Владата „тајно“ ги утврди, Собранието експресно, со 48 гласа „за“ ги донесе измените на Кривичниот законик
- Кој „потајно“ ги поддржува, а кој е против измените на КЗ – опозициските партии со меѓусебни обвинувања
Судскиот процес „Титаник“, кој се однесува на кривични дела против изборите и гласањето за парламентарните избори во 2011 и 2014 и локалните избори 2013 година, од февруари 2022 година започна од почеток поради промена на поротник во судечкиот совет. На новиот старт на процесот, Јанакиески и уште седум обвинети признаа вина. Ексминистерот тогаш призна вина за повеќето дела, меѓу кои беа злосторничко здружување, повреда на слободата на определување на избирачите и уништување на изборен материјал.
Тој не призна вина само за злоупотреба на средствата за финансирање на изборна кампања, дело за кое сега обвинителството се откажа од прогон.
По признавањето вина за останатите дела, Јанакиески и седумтемина други добија и пресуда од првостепениот суд. Тој беше осуден на затворска казна од 4 години и шест месеци.
Меѓу останатите обвинети кои признаа вина беа и ексминистерката Гордана Јанкулоска која доби затворска казна од 2 години и 6 месеци, поранешната заменик-министерка за правда Гордана Бришковска-Бошковски и Мартин Протуѓер кои добија условни казни. Од останатите четворица кои признаа вина, тројца исто така добија условни казни, додека еден обвинет доби казна затвор од 3 години.
Влатко Илиевски, адвокат и сопруг на ексминистерката за внатрешни работи Гордана Јанкулоска, во емисијата „360 степени“ на ТВ Алсат емитувана на 2 април, годинава рече дека во случајот „Титаник“ било договорено Јанкулоска да признае вина и да заврши со условна казна, но добила две и пол години затвор.
На 4 јули годинава, пак, ексминистерот за транспорт и врски Миле Јанакиески доби пониска затворска казна од определената со првостепената пресуда, а поранешната министерка за внатрешни работи Гордана Јанкулоска е осудена условно наместо со затвор.
Ова беше дел од одлуката што ја донесе петчлениот совет во Апелацискиот суд Скопје за дел од обвинетите во случајот „Титаник“ кој се однесува на изборни нерегуларности.
Станува збор за пресуда на Апелација за дел од овој обемен предмет, во којшто се опфатени осум обвинети кои во февруари лани решија да признаат вина. Меѓу нив, најистакнати имиња кои се решија на ваков чекор се двајцата поранешни министри.
„Титаник“ првично опфаќаше 21 лице. Сега како обвинети кои не признаа вина и за кои продолжи судскиот процес остануваат експремиерот Никола Груевски кој е првообвинет и му се суди во отсуство, како и поранешниот генерален секретар на Владата, Кирил Божиновски, експратеникот Илија Димовски, бившиот градоначалник на Пустец, Едмонд Темелко и уште девет други лица.