„Бараме да не ни ги бројат деновите како да сме туристи, туку како возачи. Треба да ни ги бројат часовите. Ако на граница влезам во 15 часот, тоа ми го сметаат како цел ден. Со денови стоиме на граници и нè малтретираат. Колега е задржан четири часа во притвор, како криминалец го држат бидејќи пречекорил десетина дена“, изјави професиопнален возач
Точно напладне почна протестот на професионалните возачи од земјава, организирани од транспортната aсоцијација „Макам-транс“, пред седиштето на Делегацијата на Европската Унија (ЕУ) во Скопје.
Истакнаа транспаренти со пораки: „На пат сме по работа, не за одмор“, „Броиме денови, наместо километри“, „Европски вредности или европски казни“.
Дел од нив во изјави за медиумите изразија револт велејќи дека се оневоможени да ја извршуваат работата поради ограничениот престој во Шенген-зоната.
„Бараме да не ни ги бројат деновите како да сме туристи, туку како возачи. Треба да ни ги бројат часовите. Ако на граница влезам во 15 часот, тоа ми го бројат како цел ден. Со денови стоиме на граници и не малтретираат. Колега е задржан четири часа во притвор, како криминалец го држат бидејќи прекорачил десетина дена“,
вели професионалниот возач Димитар Стојановски.
Сметаат дека ако се ограничи нивната работа, државата ќе се соочи со недостиг од основни производи.
„Ако не сме ние, ќе снема храна и опрема. Бараат да одиме со термини, а ним им треба робата. Ако не сме ние, ќе снема храна, нафта и лекови.“
посочија учесниците на протестот.
Сенат Идризи, сопственик на транспортната фирма „Нескомерц“ од Тетово, рече дека е потребно да се организраат блокади на граничните премини.
„Овојпат ќе одиме до крај до конечно решение оти минатиот пат немаше“,
додаде тој.
Според него, возачите одбиваат тури поради страв дека ќе добијат забрана за влез во земјите од Шенген-зоната.
Ова, како што посочија, е предупредувачки протест пред утрешниот состанок на Работната група во Брисел, од кој превозниците очекуваат конкретно решение за нивниот статус по воведувањето на системот за влез и излез – ЕЕС (Entry/Exit System) во ЕУ, според кој државјаните од трети земји можат да престојуваат во земјите од Шенген најмногу 90 дена, во кој било период од 180 дена.
Според Асоцијацијата „Макам-транс“, Европската Унија во изминатите седум месеци не покажала добра волја за надминување на проблемот, иако во визната стратегија возачите се признаени како професионалци кои вршат дејност.
Двочасовни протести, во истиот период од 12 до 14 часот, денеска ќе се одржат и во Србија, Босна и Херцеговина (БиХ) и во Црна Гора.