Унгарскиот премиер рече дека сите земји на НАТО стојат на ветувањето за колективна безбедност, што според него, значи дека нападот врз еден сојузник на НАТО е напад врз сите
Невозможно е рускиот претседател Владимир Путин да нападне земја на НАТО, изјавил унгарскиот премиер Виктор Орбан во интервју за германскиот весник „Билд“, посочувајќи дека напад врз НАТО е целосно невозможен, не само за Русија, туку и за кој било во светот, зашто според него, тоа е убедливо најсилната воена заедница.
Унгарскиот премиер рече дека сите земји на НАТО стојат на ветувањето за колективна безбедност, што според него, значи дека нападот врз еден сојузник на НАТО е напад врз сите.
Како што посочи во интервјуто, русите имаат поинаква историја и култура и различно разбирање за слободата и националниот суверенитет од Европејците.
„Но, тие се рационални, тие се хиперрационални“,
рече тој.
Како одговор на тоа дека инвазијата врз Украина не била рационална опрација, тој посочи дека ирационалноста се разликува од правењето грешка во рационална пресметка.
Орбан денеска беше во ненајавена посета на Кина, а на 5 јули исто така беше во ненајавена посета на Москва, каде што се сретна со рускиот претседател Владимир Путин и разговараше со него, меѓу другото, за ситуацијата во Украина, а претходно на 2 јули го посети Киев и разговараше со украинскиот претседател Володимир Зеленски.
Со оглед на претседателските избори во САД во ноември, Орбан рече дека верува оти американскиот претседател Џо Бајден нема повторно да влезе во Белата куќа.
Во интервјуто го пофали Доналд Трамп о го нарече човек на мирот.
„Тој е бизнисмен, самоизграден, има различен пристап кон сè. И мислам дека тоа е добро за светската политика“, рече Орбан. „Да не заборавиме дека тој е човек на мирот“, нагласи Орбан, додавајќи дека Трамп не започнал ниту една војна во текот на неговите четири години минати во Белата куќа.
Орбан е единствениот премиер на една земја од ЕУ кој отворено ја дава својата поддршка за Трамп.