Судот во Невада и гувернерот на Пенсилванија, и двете одлучувачки држави, се последните кои во изминативе 24 часа ги потврдија резултатите во нивните сојузни држави според кои победи Бајден
Највисокиот суд на американската сојузна држава Невада потврди дека Џозеф Бајден е победник на претседателските избори во оваа држава, со што резултатот од гласањето стана официјален.
Со оваа едногласна одлука на седумте непартиски судии, шесте изборни (електорски) гласа од оваа сојузна држава одат на контото на Бајден.
Тужбите на правниот тим на актуелниот претседател Доналд Трамп го одолжија процесот на прогласување на победникот од претседателските избори што се одржаа на 3 ноември, поради дополнителната контрола на гласовите, а со цел да спречат прифаќање на сите 1,82 милион гласачки ливчиња испратени по пошта и да се запре броењето на уште 1,4 милион ливчиња.
Бајден победи во Невада со предност од 33 596 гласа, односно со освоени 50,06 % од гласовите, наспроти Трамп со 47,67 % од гласовите.
Излезеноста на овие избори е 77,3 проценти, во споредба со 76,8 проценти на претседателските избори во 2016 година, кога демократката Хилари Клинтон ја освои Невада со нешто помалку од 2,5 проценти предност во однос на Трамп.
Победа на Бајден и во Пенсилванија
Во меѓувреме, и уште една од одлучувачките држави, Пенсилванија, ја потврди победата на Бајден на претседателските избори, откако претходно тоа го стори и Мичиген.
Гувернерот на Пенсилванија, Том Волф, на Твитер напиша дека изборната комисија вчера ги потврдила резултатите од претседателските избори одржани на 3 ноември.
Волф додаде дека потпишал решение за победата на Бајден и неговиот кандидат за потпретседател на САД, Камала Харис, во оваа сојузна држава, која носи 20 изборни гласа.
Конечните резултати му даваат на Бајден предност од 81 000 гласа, од вкупно околу 6,9 милиони гласа пред Трамп. Во Пенсилванија, во 2016 година, Трамп ја победи Клинтон со предност од 44 000 гласа.
Државата Мичиген ја потврди победата на Бајден во понеделникот и таа победа му донесе 16 изборни гласа.
Во САД е вообичаено секоја федерална држава индивидуално ги потврдува своите изборни резултати. Сепак, одбивањето на Трамп да го признае поразот годинава го отежна и го одложува процесот во клучните земји што носат најмногу изборни гласови.
Вчера, новоизбраниот претседател на САД, Бајден, претстави дел од првите луѓе во новата администрација, која стапува на власт од 20 јануари 2021 година.
Ова следува откако администрацијата на претседателот на САД, Доналд Трамп, даде формално одобрување тимот на новоизбраниот претседател да започне со процесот на транзиција на власта.
Известувањето го испратил шефицата на Службата за општа администрација, Емили Марфи, со писмо во кое го нарекува Бајден „очигледно избраниот претседател“.