Наглиот скок на новозаразени со ковид-19 во САД во најголем дел е предизвикан од игнорирање на препораките да се одржува растојание и да се носат маски, нагласи главниот експерт на Управата за инфективни болести на САД.
Дневниот скок на новозаразени е најизразен во јужните и западните сојузни држави, кои не ги следеа препораките на здравствените службеници да чекаат постојан пад на инфекциите пред да се отвори економијата.
„Тоа е рецепт за катастрофа“,
изјави Ентони Фаучи, директор на Националниот институт за алергија и заразни болести за Си-Ен-Ен.
Фаучи оценува дека решение е вакцина против коронавирусот, која би обезбедила заштита од 70 до 75 проценти. Сепак, според него, прашање е дали и вакцината би резултирала со задоволително ниво на имунитет во САД за да се задуши епидемијата, со оглед на тоа што голем број Американци велат дека не сакат да се вакцинираат.