Најавата на Министерството следува откако граѓанската иницијатива „Стоп за Усје“ реагираше дека Државниот инспекторат за животна средина (ДИЖС) без образложение ја прекинал праксата на објавување неделни извештаи за извршените инспекциски надзори
Неделните извештаи на Државниот инспекторат за животна средина (ДИЖС) ќе продолжат да се објавуваат иако за тоа не постои експлицитна законска обврска – велат од Министерството за животна средина и просторно планирање по реакцијата на граѓанската иницијатива „Стоп за Усје“ дека Инспекторатот без образложение ја прекинал праксата на објавување неделни извештаи за извршените инспекциски надзори.
„Редовното објавување на информациите за извршените инспекциски надзори претставува важен инструмент за информирање на граѓаните и за јакнење на довербата во институциите. Оттука, неделните извештаи на Државниот инспекторат за животна средина ќе продолжат да се објавуваат, иако за тоа не постои експлицитна законска обврска. Редовното објавување на информациите за извршените инспекциски надзори претставува важен инструмент за информирање на граѓаните и за јакнење на довербата во институциите“,
велат од Министерството за животна средина и просторно планирање.
Додаваат дека се на ставот оти кога станува збор за информации од јавен интерес, особено во делот на загадувањето и заштитата на животната средина, стандардот треба да биде поголема, а не помала информираност.
„Во оваа насока е и активноста за воспоставување Регистар на загадувачи. Во тек е подготовка на потребните технички решенија, а ќе бидат иницирани и соодветни законски измени за да се обезбеди негово целосно функционирање и јавна достапност. Целта е граѓаните да имаат повеќе информации, полесен пристап до податоци и поголема можност да ги следат состојбите и постапувањето на институциите. Тоа е обврска што произлегува и од нашите реформски заложби и од европските стандарди за транспарентност“,
додаваат од МЖСПП дополнувајќи дека остануваат доследни на определбата за поголема транспарентност и навремена информираност на јавноста.