Цените на макароните и шпагетите, според Бектеши, ќе се намалат за најмалку 10 отсто. Во наредните 10 дена, пак, се очекува и маслото за јадење да падне под 100 денари за литар
По лебот, замрзнување на цените се очекува да има и за тестенините, а следни на оваа листа би можеле да се најдат и млечните производи.
Најавата дојде од министерот за економија Крешник Бектеши во неговото гостување во емисијата „24 анализа“ на ТВ 24.
„Во текот на оваа недела ќе се донесе одлука за замрзнување на цени на други прехранбени производи, се прават анализи од страна на Министерството за економија во делот на увозни цени, се разговара со здруженијата во рамки на коморите и се земаат податоците од Државниот пазарен инспекторат. Најверојатно, до крајот на неделата ќе има одлука за замрзнување на цените на тестенините, односно за макарони и шпагети“,
рече Бектеши.
Министерот вели дека според првичните анализи минималното намалување ќе биде 10 отсто од постоечките цени на овие тестенини, но оти е убеден дека тоа ќе биде и поголемо.
„Убеден сум дека намалувањето ќе биде и поголемо имајќи предвид дека имаме цени од одредени тестенини кои во моментов се продаваат по 51 денар, тие нема да бидат повеќе од 44 денари. Имаме тестенини кои се продаваат од околу 60 денари, тие нема да бидат повеќе од 52 денари, ќе има големо намалување во тој дел“,
рече Бектеши.
Во делот на маслото за јадење, пак, како што посочи, во наредните 10 дена се очекува сите производители да имаат цена под 100 денари за литар.
„Ако правиме споредба пред да почне поддршката од Владата, кога цената на маслото за јадење беше 150-160 денари, речиси 60-70 отсто ќе има намалување и потоа ќе продолжиме и со другите производи“,
порача министерот.
Бектеши вели дека одредени компании самостојно веќе најавиле намалување на цените, а ги повика и останатите да го следат примерот.