Да се даде физиолошка терапија на пациент наместо лек, тој што го напишал ова треба да го докаже и да поднесе одговорност ако не е така“, рече д-р Васев
На реверс се земале лекови само во случај кога не смееле да дозволат да им се прекине терапијата на пациенти што веќе почнале да ја примаат. Ова го посочи поранешниот директор на Клиниката за радиотерапија и онкологија Никола Васев, кој денеска одговараше на пратеничките прашања на Анкетната комисија, формирана за утврдување евентуална политичка одговорност за случајот Онкологија.
Потврди дека се користеле лекови земени на реверс, за што посочи дека е правно недозволиво, но го практикувале оти Хипократовата заклетва ги обврзува да не ги остават пациентите без лекови.
„Прво, апсолутно се согласувам дека реверсот не треба да се користи. Главна намена на реверсите беше да не се прекине биолошката терапија што пациентите почнале да ја примаат. Тендерската постапка за тие лекови беше почната, не е земен реверс без постапка. Постапката беше почната, но два-три месеци задоцни. Ниту јас ниту кој било не смееше да го загрози животот на пациентите што веќе почнале да ја примаат терапијата. Тие лекови значеа живот за нив и тоа е поскапо. Не знам што би кажал друго тука. Тука се крши Хипократовата заклетва со правната одговорност на Институтот. Тие две заклетви овде не може да ги споите. Па, не сме зеле столови и градежен материјал, сме зеле лекови од една фирма кога и не може друга да конкурира. И, второ, јас сум се обезбедил со писмо што ќе ви го доставам дека ако тие фирми изгубат на тендерот, тој лек ќе биде донација. Тоа писмо ќе го доставам кај вашата претседателка“,
рече Васев укажувајќи дека три месеци пред да се потрошат лековите во резервите редовно ги известувале Фондот за здравство и Министерството за здравство.
Поранешниот директор Васев како свој неуспех призна дека го смета и тоа што не успеал да воведе пракса за стручен колегиум, на кој барем еднаш неделно сите лекари од Клиниката ќе седнат на исто место.
Тој рече дека на Онкологија стручен колегиум не се одржал 10 години.
Васев имаше објаснување и за обвинувањата дека лично тој со потпис одобрувал кој пациент ќе добие терапија. Укажа дека раководителите на одделенија одлучувале кому ќе му дадат лек и не си се мешале едни на други во работата, а кај него на потпис стигнувале оти водел евиденција.
„Докторите ги пишуваа историите со лекови, сестрите ги собираа историите, доаѓаа кај мене за потпис – не за тоа дали да се земе лек или не, туку дека тој лек го има на Институтот. Јас си водев евиденција да не надминеме количини што ни беа строго дефинирани. Не знам во кој случај било загрозено правото на пациентите да имаат пристап до биолошката терапија ако на сите пациенти им се одобрува терапијата“,
рече д-р Васев.
Прва прашање му постави претседателката на анкетната комисија Рашела Мизрахи. Откога му прочита дел од наодите на Државниот завод за ревизија, кои укажуваат на лошото работење на Клиниката и сомнежот дека немале сите болни еднаков пристап до лекување, го праша дали некој му дал согласност за да биде целосен хаос во работењето на Клиниката за онкологија.
„Никогаш не ми била намерата да креирам хаос. Функцијата ја прифатив од министерот за здравство Таравари по долго убедување. Искрено, се мислев дали да ја прифатам, но како најстар доктор на Институтот чувствував малку и одговорност мислејќи дека ќе ја подобрам здравствената заштита на нашите пациенти. 35 години работам со онколошки пациенти, ниеден човек од мојата врата не сум вратил. Го читавме извештајот, за жал, го добивме откога не сум на функција. Не можевме да одговориме, веројатно сум имал право, не сум знаел за тоа. Сигурно ќе се обидев да одговорам на сите наводи“,
рече Васев.
Неговиот став, и покрај наодите на Државниот завод за ревизија, е дека ниту еден пациент не бил оставен без терапија.
На прашањето дали имал информација за можно продавање на терапии и лекови во периодот кога директорувал.
„Она што имавме информации од сестри пријавивме веднаш, два случаи и едниот од мое време. Да се даде физилошка терапија наместо лек, тој што го напиша ова треба да го докаже тоа и да поднесе одговорност ако не е така“,
заклучи д-р Васев.
Досега пред Анкетната комисија, која треба да утврди политичка одговорност за скандалот со терапијата на Онкологија, зборуваа министерот за внатрешни работи Оливер Спасовски и поранешните министри за здравство Венко Филипче и Беким Сали, актуелниот министер за здравство Фатмир Меџити, поранешните и актуелните директори на Фондот за здравствено осигурување на Република Северна Македонија, Орхан Рамадани, Фатон Ахмети, Магдалена Филиповска Грашковска.