Поради тоа што до доцна попладнево сè уште не беше објавен листингот од гласањето за Законот за Совет на обвинители не се знае кои се шестемина пратеници што дадоа поддршка за Законот за јавно обвинителство, но потоа не гласаа за втората точка на дневниот ред
Амандманот 10 од Уставот, кој беше изменет согласно Рамковниот договор од 2001 година, не предвидува двојно мнозинство за закони што се однесуваат на правосудството
Деталите за гласањето за Законот за Совет за јавни обвинители, околу што се плетат контроверзии овие два дена, сè уште не се објавени на интернет-страницата на Собранието, иако поминаа речиси 24 часа од оваа регулатива поврзана со Законот за јавно обвинителство.
За разлика од тоа, листингот од вчерашното гласање за Законот за ЈО беше објавен само неколку минути подоцна, а објавени се и листинзите за другите закони што беа донесени во последниот работен ден на овој собраниски состав. Од собраниските служби велат дека тоа што листингот за Законот за Совет на јавни обвинители не е објавен сè уште веројатно е случаен пропуст што, како што велат, ќе биде брзо исправен.
Поради тоа што до доцна попладнево сè уште не беше објавен листингот од гласањето за Законот за Совет на обвинители, не се знае кои се седумтемина пратеници кои дадоа поддршка за Законот за јавно обвинителство, но потоа не гласаа за втората точка на дневниот ред – Законот за Совет на обвинители. За вториот закон беа обезбедени 73 гласа „за“, што е речиси истата бројка гласови што беа испорачани при првото гласање за Законот за јавни обвинители, кој Џафери го поништи (74 гласа). При второто гласање беа обезбедени потребните 80 гласа за системската регулатива за јавното обвинителство.
Од собраниските служби, исто така, тврдат дека во сценариото за вчерашната 135. седница, на чиј дневен ред беа законите за обвинителството не стоело дека Законот за Советот на обвинители треба да се носи и со мнозинство гласови од пратениците од немнозинската заедница во земјава. Сепак, претседателот Талат Џафери го соопшти тоа пред гласањето за овој Закон, така што остави простор опозицијата да обвинува дека новата регулатива за Советот на обвинители, практично, не е донесена, затоа што, на крајот, немаше двојно гласање.
Џафери денеска изјави дека згрешил кога најавил дека ќе се гласа и според Бадинтер. Рече дека кога го видел сценариото сфатил дека направил грешка.
Амандманот 10 од Уставот, кој беше изменет согласно со Рамковниот договор од 2001 година, не предвидува двојно мнозинство за закони што се однесуваат на правосудството.
Во текот на вчерашниот ден, со двојно мнозинство беа донесени неколку закони од дневниот ред на 131. седница, која почна на 4 февруари, а нејзиното последно продолжение во неделата беше закажано во од. Законите за аудио и аудиовизуелни услуги и за Инспекторат за употреба на јазиците беа донесени со по 28 гласа според Бадинтеровиот принцип.