Парите не се предвидени затоа што бевме во изборен процес и не сакавме да направиме изборен поткуп како што тоа се правеше во минатото од страна на политичкиот опонент. Во секој ребаланс после избори е нормално да се прераспределат средства, а плати за вработени во јавен сектор никогаш не се доведуваат во прашање, вели Лукаревска
ВМРО-ДПМНЕ го покачува дефицитот за цели 36%, а јавниот долг на ризични 68%, обвини пратеничката на СДСМ Сања Лукаревска на прес-конференција посветена на ребалансот на буџетот. Овој процент на јавен долг, како што рече, е спротивен на Мастришките декларации и сериозно ќе го наруши кредитниот и финансискиот рејтинг на земјава. Според неа, ВМРО-ДПМНЕ со овие буџетски политики ќе направи хаос и ќе создаде зависност од кредитирање, не постои ниту еден сериозен финансиски експерт или макро економист кој овој ребаланс го смета за оправдан.
Со ребалансот не се предвидува покачување на платите, ниту почитување на колективните договори, затоа што работниците се неважни за ВМРО-ДПМНЕ, посочи Луакревска.
„Тука сакам да ја разобличам манипулацијата која секој ден ја повторуваат, дека немало пари во буџетот. Замислете им се ветува на луѓето дека загарантираната плата која никогаш во последните седум години не била доведена до прашање, тие ќе ја обезбедат. Какво потценување и манипулирање. Им порачувам на работниците да не дозволат ваква манипулација. Единствена причина зошто ова го прават е тоа дека покачување на плати нема да има и да бидат среќни што воопшто земале плата. Ова е жално и потценувачки за работниците,“
рече Лукаревска.
Во однос на нападите дека душмански се трошело и дека фалат 500 милиони евра од буџетот, таа вели дека станува збор за лага.
„До моментот на изборите ако отидете на Отворени финансии платформата за транспарентност ќе видите дека за сите трошоци се предвидени средства. Ниту еден денар не фали. Ова што го сервира ВМРО-ДПМНЕ е само за полтички потреби. Не е точно дека нема пари, ниту дека не се знае каде се. Обвинувањата дека инситуциите ќе се занимаваат со ова се паушални. Причината за однесувањето ан ВМРО-ДПМНЕ е очигледна – да создаде перцепција дека СДСМ направил хаос и граѓаните да се помират дека нема пари за нив. А второ, да се создаде алиби за кредитот од Унгарија. Ова е финансиски колапс во најава“,
обвини Лукаревска.
Во секој ребаланс по избори е нормално да се прераспределат средства, рече таа и се осврна на обвинувањата дека во Буџетот немало предвидено плати за одредени институции.
„Парите не се предвидени затоа што бевме во изборен процес и не сакавме да направиме изборен поткуп како што тоа се правеше во минатото од страна на политичкиот опонент. Во секој ребаланс после избори е нормално да се прераспределат средства, а плати за вработени во јавен сектор никогаш не се доведуваат во прашање,“
посочи таа.
Вчера министерката за финасии Гордана Димитриеска-Кочоска соопшти дека Буџетот е оштетен за повеќе од 32 милијарди денари (околу 520 милиони евра), посочувајќи дека со анализите во министерството со кое раководи констатирано е дека има многу доспеани обврски, но обврски што не биле пријавувани.
Таа, а претходно и премиерот Мицкоски најавија дека истражните органи ќе треба да проверат како се трошело и зошто одредени институции се оставени во долгови и без предвидени плати за вработените.