„Тоа беше еден аларм дека е голем процентот на лица коишто ќе остварат пензија од осигурување, пресметана паралелно од првиот и од вториот столб, која ќе биде под прагот на минималната пензија, што значи дека за тие лица ќе се активира механизмот на минимална пензија и ќе треба да се врши доплата“, вели првиот човек на АДПФ, Маријан Николовски
Од друга страна, петмина корисници добиваат пензија поголема од максималната што би ја земале ако биле осигурени само во првиот столб
Фактот што дури 113 од 147 први корисници на пензија и од вториот столб земаат минимална пензија е поради начинот на којшто се пресметува (и во едностолбниот и во комбинираниот систем), а зависи најмногу од работниот стаж и од просекот на платите на коишто било пријавено едно лице во текот на работниот век – вели претседателот на Асоцијацијата на друштва за управување со пензиски фондови (АДПФ), Маријан Николовски, во гостување во „360 степени“ на МРТ 1.
„Тоа беше еден аларм дека е голем процентот на лица коишто ќе остварат пензија од осигурување, пресметана паралелно од првиот и од вториот столб, која ќе биде под прагот на минималната пензија, што значи дека за тие лица ќе се активира механизмот на минимална пензија и ќе треба да се врши доплата. Она што е специфично е дека кај двостолбниот систем, за почеток доплатата до минималниот износ ја врши вториот столб, односно се користат средствата од индивидуалната сметка, а по исцрпувањето на тие средства, минималната пензија продолжува да ја исплаќа државниот фонд ПИОМ. За овие лица главна карактеристика е што имаат релативно краток работен стаж (20-21 година) и ниски основици како плати за осигурување во текот на работниот век“,
вели Николовски.
Во однос на петтемина од 147 кои земале над максималната пензија, Николовски вели дека станува збор за лица со подолг работен стаж кај кои пресметката е поправична. Во вториот столб, како што вели, нема максимален износ на исплата, како што е со првиот столб, па за идните корисници е поволно комбинирањето меѓу прв и втор пензиски столб.
„Значи, тоа се лица коишто имаат некаде околу 34 години просечен работен век и многу високи основици на осигурување. Тоа дава еден позитивен сигнал дека кај оваа категорија осигуреници нивната пензија е поправедно пресметана во однос на нивниот придонес во текот на работниот век, бидејќи тоа што тие биле долго време пријавени и биле пријавени на високи основици, означува дека и нивниот придонес кон системот бил поголем“,
додава Николовски.
Околу најавите за можно укинување на вториот пензиски столб, Николовски вели дека таква мерка досега не е дискутирана со АДПФ.
„Добро е што се води дебата во насока на подобрување на правата на осигурениците, добро е што се детектира дека голем број осигуреници ќе примаат минимален износ на пензија без разлика дали се само во стариот систем или во двостолбниот, и тука треба да обрнеме малку поголемо внимание како во иднина да се стимулираат самите осигуреници да имаат подолг работен век и да се осигуруваат на поголеми основици. Овие пет кои ги споменавте се добар пример дека доколку вие одработите полн работен век (35 години за жена или 40 години за маж) и се осигурувате на реални приходи на платата којашто сте ја земале, вашата пензија соодветно ќе ја замени вашата плата низ годините“,
вели Николовски.
Во врска со мерката за т.н. мултифондови, Николовски вели дека веќе се практикува во светски рамки, во држави со слични пензиски системи.
„Тоа значи наместо инвестиционата политика на фондот да биде подеднаква за сите негови членови (и оние што се на возраст од 25-30 години и оние што се веќе над 60 или се пред прагот на пензионирањето), да се направи сегментација на три одделни портфолија или инвестициони политики. За младите коишто стапуваат во работен век односно се на почетокот на својата кариера, да се овозможи поголем дел од средствата да се инвестираат во акции и во акциски фондови, бидејќи кај инвестирањето на долг рок клучен е временскиот хоризонт што тие го имаат пред себе. И искуствата од Хрватска, на пример, покажуваат дека со ваков начин на вложување на средствата се остваруваат еден, два, три процентни поени над балансираното портфолио коешто ние моментално го имаме како систем. Значи, балансираното портфолио би се задржало за лицата коишто се во средна возраст, а конзервативното би било за оние што се пред пензионирање и по пензионирање. Целта на овие портфолија е да се заштитат од пазарни флуктуации бидејќи тогаш сметките им имаат најголеми износи и тоа што е заработено низ годините треба да се заштити“,
посочува Николовски.
Во емисијата гостуваше и министерот за социјална политика Ѓоко Велковски.