Како што објави минатата недела германскиот весник „Велт“, од почетокот на рускиот напад на Украина, Бугарија тајно го снабдувала Киев со оружје и дизел преку неофицијални канали и преку приватни компании и посредници, независно од противењето на Владата во Софија
Не е тајна дека Бугарија извезувала оружје во Украина преку други земји. Чудното во оваа ситуација е што овие информации ги добиваме од странски медиуми, а не од поранешниот премиер, изјави синоќа техничкиот министер за одбрана на Бугарија, Димитар Стојанов за локални медиуми. Изјавата беше дадена во врска со написот на германскиот весник „Велт“ во кој се тврди дека Бугарија испорачувала гориво и муниција на Украина во првите месеци од војната.
„Во однос на муницијата ќе ви дадам пример – во 2021 година во Романија и Полска се извезуваше муниција во опсег од околу 30 милиони, во 2022 година – за 2,6 милијарди. Значи секој може да пресмета два плус два. Според мене, словото на законот е испочитувано бидејќи се работи за комерцијални трансакции. Духот на законот може да биде доведен во прашање“,
изјави Стојанов.
Вицепремиерката Корнелија Нинова, која беше одговорна за ова, неколкупати рече дека не сме извезле ниту еден шаржер во Украина – директно не сме извезле, но индиректно да, од секаде информациите се такви, додаде тој.
Како што објави минатата недела германскиот весник „Велт“, од почетокот на рускиот напад на Украина, Бугарија тајно го снабдувала Киев со оружје и дизел преку неофицијални канали и преку приватни компании и посредници, независно од противењето на Владата во Софија.
Според тврдењата на весникот, поранешниот премиер на Бугарија, Кирил Петков, минатата година водел тајна операција за снабдување на Украина „зад грбот“ на неговите социјалистички коалициски партнери, кои биле против воената помош за Украина.