На Фејсбук ексминистерката објави дека е дома со семејството и нема намера да бега
Министерството за внатрешни работи презема стандарди полициски оперативни мерки и активности, велат од МВР во врска со обвинувањата од поранешната министерка за внатрешни работи Гордана Јанкулоска дека зградата во која живее е под опсада.
„Преземаме стандардни полициски оперативни мерки и активности, а се уште од судот немаме добиено никаква наредба за спроведување на Г.Ј. Кога ќе добиеме наредба од судот, ќе постапиме. За сите други информации е надлежен судот“,
истакнуваат од МВР.
Јанкулоска денеска на Фејсбук објави статус заедно со фотографија на која се гледа возило пред нејзината зграда и обвинувања дека се наоѓа под опсада, а нејзините соседи биле претресувани.
„Нема потреба од спектакли, опсада на зградата во која живеам, вознемирување и претресување на соседите. Ако некој ме бара јас сум дома и на крај памет не ми паѓа некаде да бегам. Ништо не е поскапоцено од секој момент поминат со семејството“,
напиша Јанкуловска на својот Фејсбук профил.
Нејзината објава е реакција на видеото што го објави ТВ Клан и информацијата вчера, според која се врши проверка на сите автомобили кои циркулираат во близина на нејзината зграда.
Ова се случи откако Врховниот суд ја потврди затворската казна за случајот „Тенк“ за набавката на блиндираниот „мерцедес“, според која Груевски е осуден на две години затвор, a Јанкулоска и Поповски на 4 години.