Дел од медиумите пред неколку дена објавија дека Скопската епархија потврдила оти нема да има погреби за време на празнувањето на Св. Никола, но дека верниците ќе треба да ги одложат погребите и за време на Божик и Велигден. Од друга страна, пак, денеска од Скопската епархија велат дека оваа информација била пренесена поради меѓусебна некоординираност внатре во епархијата и дека некој погрешно пренел оти е донесена таква одлука
Не е точно дека се забрануваат погреби на празници како Свети Никола, Божик, Велигден и задушница, иако се разговараше за тоа, велат од Скопската православна епархија при МПЦ-ОА во демант на информациите што ги објави „А1 он“ дека се забрануваат погреби на овие празници.
„По барање на дел од свештенството од Скопската епархија да не се извршуваат погребенија на празникот на светиот Николај Чудотворец, во саботите на Духовденската и Митровденската задушница, и на првиот ден на Божик и Велигден, беа остварени средби со раководството на АД ‘Бутел’ на коишто се разговараше за таа можност. Но, конечно, таква одлука не беше донесена“,
се вели во соопштението од Скопската православна епархија.
„А1он“ на 19 декември објави дека Скопската епархија потврдила оти нема да има погреби за време на празнувањето на Св. Никола, но дека верниците ќе треба да ги одложат погребите и за време на Божик и Велигден.
Од друга страна, пак, денеска од Скопската епархија велат дека оваа информација била пренесена поради меѓусебна некоординираност внатре во Епархијата и дека некој погрешно пренел оти е донесена таква одлука.
„Како последица на тоа дојде до несаканите случувања. Затоа, уште еднаш истакнувајќи дека за тоа беше само разговарано, а не и одлучено, известуваме дека погребенијата ќе продолжат да се извршуваат секојдневно, како, впрочем, и досега“,
нагласува во соопштението од канцеларијата на Скопската православна епархија.