Охриѓанецот против кого е поднесено обвинението, како што информираат од Обвинителството, е обвинет дека заедно со уште едно лице, засега непознато, на секретарот на бугарскиот клуб во Охрид му нанел тешки телесни повреди од омраза поради неговата националната и етничката припадност
Основното јавно обвинителство (ОЈО) Охрид поднесе обвинение против напаѓачот на секретарот на бугарскиот клуб „Цар Борис Трети“ во Охрид, Христијан Пендиков.
Охриѓанецот против кого е поднесено обвинението, како што информираат од Обвинителството, е обвинет дека заедно со уште едно лице, засега непознато, на Пендиков му нанел тешки телесни повреди од омраза поради неговата националната и етничката припадност.
„На 19 јануари, во кафе-бар во Охрид, обвинетиот најпрвин пристапил до масата на која седел оштетениот и му забележал затоа што се изјаснувал како Бугарин. Подоцна, кога оштетениот го напуштил објектот и се движел кон неговото возило, обвинетиот и другото непознато лице почнале да го следат, го нападнале и го удирале со раце и нозе по главата и телото, нанесувајќи му тешки телесни повреди“,
наведуваат од Обвинителството.
Во соопштението од ОЈО Охрид се додава дека за време на истражната постапка против 24-годишниот охриѓанец, која охридското обвинителство ја покрена еден ден по нападот на Пендиков, обвинетиот се бранел со молчење. И покрај тоа, додаваат дека сите околности биле проверени и потврдени со изјави на сведоци на инцидентот на 19 јануари и со обезбедените снимки од видеонадзорот на местото на настанот.
Од Обвинителството посочија дека до Судот во Охрид е поднесен и предлог за продолжување на мерката притвор за обвинетиот, а во меѓувреме, додаваат дека и натаму се трага по вториот напаѓач кој бил вклучен во инцидентот.
Пратеникот од Продолжуваме со промените и поранешен министер за иновации на Бугарија, Даниел Лорер, пред извесно време, коментирајќи го случајот со претепувањето на секретарот на клубот „Цар Борис Трети“, изјави дека Пендиков не е бугарски државјанин туку дека се дефинира себеси како личност со бугарска самосвест. Од друга страна, посочи дека еден од неговите напаѓачи е бугарски државјанин.
„Зошто да не зборуваме за него? Што правиме во врска со него?“,
праша Лорер во интервју за бугарската Нова ТВ.
Секретарот на бугарскиот клуб „Цар Борис Трети“ во Охрид, Христијан Пендиков, беше претепан пред кафе-бар во Охрид кон средината на јануари, по што Бугарија организира негов транспорт до Софија со владин авион. Тој до пред два дена беше хоспитализиран во Воено-медицинската академија (ВМА) во Софија каде што закрепнуваше од нападот.
Откако беше отпуштен од болницата, Пендиков се сретна со бугарскиот претседател Румен Радев од кого добил уверување оти Бугарија нема да толерира насилство врз Бугарите во Северна Македонија и врз нејзините граѓани и ќе ги користи сите национални и меѓународни инструменти за заштита на нивните права.
Министерството за надворешни работи на Бугарија најави дека Пендиков во најскоро време ќе добие бугарско државјанство, а ќе му биде обезбеден и стан за време на неговиот престој во земјата. Освен стан, можно е да добие и свое лично обезбедување зашто, како што изјави шефот на бугарската дипломатија, Пендиков стравувал за својот живот доколку се врати во Северна Македонија.