„Откако МВР постапило и го обезбедило осомничениот за насилството, надлежниот јавен обвинител го пуштил на слобода, со благи мерки на претпазливост и тактизира. Ова е скандалозно однесување на Обвинителството, за кое мора да има одговорност“, се наведува во партиското соопштение

Владејачката ВМРО-ДПМНЕ остро и недвосмислено го осудува насилство врз младата девојка од Охрид, изразувајќи целосна поддршка и сочувство со Сара и нејзиното семејство. Од партијата порачуваат дека за насилство нема и нема да има место во државата, нагласувајќи дека никој не е над законот.
Во реакцијата се посочува дека иако МВР брзо реагирало и го обезбедило осомничениот, скандалозно е однесувањето на надлежниот јавен обвинител кој го пуштил на слобода со благи мерки на претпазливост.
„Откако МВР постапило и го обезбедило осомничениот за насилството, надлежниот јавен обвинител го пуштил на слобода, со благи мерки на претпазливост и тактизира. Ова е скандалозно однесување на Обвинителството, за кое мора да има одговорност“,
се наведува во соопштението од ВМРО-ДПМНЕ.
Од партијата велат дека доколку постојат индиции дека кој било, па дури и во рамките на Обвинителството, се обидува да го заташка случајот или незаконски да влијае врз постапката, тоа лице мора веднаш да биде изведено пред лицето на правдата. Дополнително, се нагласува дека доколку институциите не постапат во согласност со законите, сите одговорни лица исто така ќе бидат повикани на одговорност.
Оваа реакција доаѓа по информациите од СВР Охрид, од каде потврдија дека е поднесена кривична пријава против 31-годишниот К.К. за кривично дело тешка телесна повреда по член 131 став 3 од Кривичниот законик. Според полицискиот билтен, на 15 ноември во раните утрински часови, по вербална расправија во неговиот дом и во автомобил, пријавениот физички ја нападнал 26-годишната девојка. Девојката од силината на ударите изгубила свест и паднала, по што била хоспитализирана со тешки телесни повреди.
Истиот ден, по пријава од мајката на осомничениот дека таткото на девојката упатил телефонски закани кон нивното семејство, полицијата го лиши од слобода и таткото на жртвата, против кој исто така ќе биде поднесен соодветен поднесок.
