Според Штерјова, овој случај е последица на неказнивоста, партизацијата на институциите и заштитата што власта им ја овозможува на лица блиски до партијата

Социјалдемократскиот сојуз на Македонија (СДСМ) бара заштита за претепаната девојка Сара од Охрид и одговорност за сите лица од ВМРО-ДПМНЕ кои, според партијата, се обиделе да го прикријат насилството, изјави Кети Штерјова од Форумот на жени на СДСМ на денешната прес-конференција.
Изразувајќи поддршка и солидарност со жртвата и нејзиното семејство, Штерјова рече дека девојката мора да добие соодветна заштита и услови за закрепнување, наместо да живее во страв од повторен напад.
„Вчера во Охрид се случи уште еден грозоморен чин на брутално насилство врз млада девојка. Сара. Безмилосно е претепана, фрлена на улица и оставена да умре. Сторителот е син на високи вмровски функционери.Изразуваме целосна поддршка и солидарност со Сара и целото нејзиното семејство. Таа заслужува заштита, мир и услови за закрепнување. Не страв дека повторно ќе биде нападната“,
рече Штерјова.
Таа се повика на јавното сведоштво на мајката на девојката, која вели дека имало обиди за прикривање на случајот и влијание врз медицинската документација.
Според Штерјова, никој не смее да биде заштитен од одговорност поради семејни и партиски врски.
„Јавноста заслужува одговори и никој не смее да биде заштитен од одговорност поради семејните и партиските врски со ВМРО-ДПМНЕ. Само затоа што насилникот е син на Љубинка Корабоска, поранешна претседателка на Државната комисија за спречување на корупцијата (ДКСК), предложена на таа функција од ВМРО-ДПМНЕ, и на Гоце Корабоски, инспектор во УЈП, за кого се зборува дека има блиски релации со Мицкоски“,
посочи Штерјова.
Според неа, овој случај е последица на неказнивоста и партизацијата на институциите и заштитата што власта им ја овозможува на лица блиски до партијата.
„Ова е последица на заштитата којашто Панче Тошковски им ја овозможува на криминалците на власт, неказнивоста, контролата над судството и обвинителството и партизацијата на системот од страна на ВМРО-ДПМНЕ. Пропустите на МВР и штитењето на криминалот имаат фатални последици“,
изјави Штерјова.
Таа побара веднаш да се утврдат сите евентуални пропусти и обиди за влијание, како и разрешување на одговорните лица од нивните позиции.
И реакцијата на СДСМ доаѓа по вчерашниот настан во Охрид кога беше претепана 26-годишна девојка. СВР Охрид поднесе кривична пријава против 31-годишниот К.К. за тешка телесна повреда, а судот му изрече мерки на претпазливост. Претходно и од владејачката ВМРО-ДПМНЕ го осудија насилството, порачувајќи дека никој не е над законот и критикувајќи го Обвинителството за благите мерки, додека државниот јавен обвинител Ненад Савески изјави дека интензивно се работи на расветлување на сите аспекти и се очекува исказот на оштетената.
