Договорот допрва треба да биде одобрен од израелската влада и доколку тоа се случи, тој треба да стапи во сила в недела
Додека светските лидери го поздравуваат постигнатиот договор за прекин на огнот меѓу Израел и Хамас и ослободувањето на заложниците, кој треба да стапи во сила в недела, светските медиуми пренесуваат за најмалку 20 загинати во израелски воздушни напади изведени синоќа врз Појасот Газа.
Повикувајќи се на извештаите на агенцијата за цивилна одбрана во Газа, управувана од Хамас, Би-би-си објави дека 12 од жртвите се во станбен блок во населбата Шеик Радван во градот Газа.
Засега, како што наведува британскиот национален сервис, нема коментар од израелската војска во врска со нападите, кои доаѓаат по објавувањето на договорот за прекин на огнот.
Инаку, договорот допрва треба да биде одобрен од израелската влада и доколку тоа се случи, тој треба да стапи во сила в недела.
Израел изведе воздушни напади и пред стапувањето во сила на договорот за прекин на огнот со милитантите на Хезболах во Либан, во ноември, лани, кога во тешките бомбардирања беше погоден и главниот град на земјата, Бејрут.
Во меѓувреме, преку соопштени договорот за прекин на огнот го поздрави и иранската Револуционерна гарда, оценувајќи го како „голема победа“ за Хамас.
Утрово се огласи и иранскиот врховен водач, ајатолахот Али Хамнеи, која на социјалната платформа Икс објави дека „фронтот на отпорот поддржан од Иран го принудил ционистичкиот режим да се повлече“.
Во пресрет на најавениот состанок на израелската влада на кој, според очекувањата треба да биде одобрен договорот, Би-би-си јавува за изјава од кабинетот на израелскиот премиер Бенјамин Нетанјаху во која Хамас се обвинува за откажување од елементите на договорот.
Портпаролот на Нетанјаху во изјавата навел дека палестинската милитантна група се обидува да „изнуди отстапки во последен момент“.
„Израелскиот кабинет нема да се состане додека посредниците не го известат Израел дека Хамас ги прифатил сите елементи од договорот“,
навел портпаролот.
Инаку, за да се дојде до прекин на огнот беа потребни месеци напорни индиректни преговори, за чија сложеност придонесуваше целосната недоверба што владее меѓу Израел и Хамас.
Хамас инсистираше на целосен крај на војната пред да ги ослободи заложниците, што, од друга страна, беше неприфатливо за Израел.
Договорот за прекин на огнот сè уште остава неодговорени прашања.
Со него се предвидува шестнеделна пауза на непријателствата, додека се спроведуваат условите предвидени во договорот, но она што останува нејасно е дали тоа ќе значи дека се става крај на војната засекогаш.
Една од клучните воени цели на Израел беше да ги уништи воените и управувачките способности на Хамас. Иако Израел сериозно го оштети, Хамас сè уште има одреден капацитет да дејствува и да се прегрупира.
Исто така, не е јасно кои заложници се живи или мртви и дали Хамас знае каде се наоѓаат сите оние за кои нема информации.
Од своја страна, палестинската милитантна група побара ослободување на некои затвореници кои Израел вели дека нема да ги ослободи. Се верува дека ова ги вклучува и оние што беа инволвирани во нападите на 7 октомври 2023 година, кои беа повод за почеток на војната.
Според планираната прва фаза од овој договор за прекин на огнот со Хамас, 33 заложници треба да бидат ослободени од Газа во замена за десетици палестински затвореници кои се чуваат во израелските затвори.
Непознат, исто така останува, дали Израел се согласува да се повлече од тампон-зоната до одреден датум, или неговото присуство таму ќе остане на неодредено време.
По објавата на договорот за прекин на огнот меѓу Израел и Хамас, шефот на програмата за развој на Обединетите нации соопшти дека според нивните проценки непријателствата предизвикале децениски загуби во развојот на Газа.
„Се соочуваме само со 40 милиони тони урнатини кои треба да се отстранат. Тие урнатини се многу опасни, токсични, има неексплодирани средства“,
изјавил Ахим Штајнер за Би-би-си.
Штајнер, кој ги надгледува напорите за поддршка на обновата и вдомувањето на раселените лица, вели дека се потребни големи напори за расчистување на урнатините за да можат луѓето да се вратат во своите домови или засолништа.
„Ова е многу сложен потфат со кој сега се соочуваме“,
додал тој.
Штајнер, исто така, рекол дека целосниот прекин на борбите и пристапот до хуманитарна помош во Газа се главните приоритети во првите 42 дена по договорот за прекин на огнот.
„Продолживме да се соочуваме со значителни ограничувања во однос на можноста за префрлање на резерви и стоки во Газа. Мораме да создадеме пристап, мораме да создадеме безбедност што ќе овозможи да се донесе помош за спасување животи“,
рекол шефот на програмата за развој на Обединетите нации.