Меѓу повредените има две деца на возраст од три и пет години и една 19-годишна девојка. Останатите повредени лица се на возраст од 30 до 60 години
Дванаесетте повредени во несреќата што се случи попладнево кај велешка „Порцеланка“, при која се судриле воз на „Македонски железници“ и такси-возило – комбе, се однесени во велешката болница и се надвор од животна опасност, информираат од ЈЗУ Општа болница – Велес.
„Сите повредени патници се задржани на испитување и опсервација. Досега се снимени половината од патниците и скршеници кај нив не се констатирани. Но, сѐ уште се вршат испитувања кај останатите половина од повредените. Целосната информација ќе ја имаме по 16 часот“,
изјави портпаролот на велешката болница д-р Елена Левкова Ќулумова.
Таа информира дека меѓу повредените има две деца на возраст од три и пет години и една 19-годишна девојка. Останатите повредени лица се на возраст од 30 до 60 години.
Информацијата дека сите повредени се надвор од животна опасност и дека на нив се вршат рентген и други испитувања ја потврди и д-р Љупчо Леов, ортопед, кој ги прегледал повредените. Тој потврдува дека засега нема констатирано скршеници кај никој од повредените, но тие сепак се оставени на опсервација, а неговиот колега, д-р Ванчо Граматов ги прегледува останатите повредени.
Денеска во 12:01 часот во СВР Велес било пријавено дека на железничкиот премин кај фабриката „Порцеланка“ во Велес се случила незгода помеѓу судриле воз на „Македонски железници“ и такси-возило – комбе со велешки регистарски ознаки, сопственост на такси компанија од Чашка, управувано од 52-годишниот Д.Ј. од Чашка.
Во изјава за ТВ Клан, градоначалникот на Општина Чашка, Горан Стојановски, пак, изјави дека во сообраќајката се повредени 12 лица, но кажа дека среќата во сета несреќа била на страната на патниците, зашто поминале со полесни повреди. Патниците, како што кажа тој, од Велес си оделе кон своите домови во селата Мелница и Чашка кога се случила несреќата.