Од Собранието засега нема потврда за наводите што Заев ги изнел пред ЦО на СДСМ (пред стартот на преговорите со Гаши) дека мнозинството е стабилно и дека моментно брои точно 61 пратеник. Џафери веќе неколку дена е во Мадрид, така што редовната (понеделничка) координација на собраниското раководство е одложена за утре
На 9 декември е закажана нова пленарна седница на парламентот – прва откако Владата не падна на тестот за доверба по локалните избори, кои предизвикаа силни турбуленции на политичката сцена и ја доведоа во прашање стабилноста на владејачкото мнозинство во Собранието.
За да почне собраниската расправа и да се премине кон утврдување на дневниот ред во пленарната сала треба да има најмалку 61 пратеник, во ситуација кога парламентарното мнозинство е разнишано и се прават обиди за негово стабилизирање.
Од Собранието засега нема потврда за наводите што премиерот Зоран Заев ги изнел пред ЦО на СДСМ (пред стартот на преговорите со Африм Гаши за проширување на владејачката коалиција) дека мнозинството е стабилно и дека моментно брои точно 61 пратеник, наспроти впечатокот во јавноста дека распоредот на сили во законодавниот дом засега е 60 спрема 60, со можност четворица пратеници на Алтернатива да го напуштат опозицискиот табор и да се приклучат кон власта.
Од друга страна, неизвесно е до кога ќе траат преговорите меѓу СДСМ и Алтернатива и кога би биле донесени конечните одлуки, односно дали тоа би се случило пред Европскиот самит на 14 декември.
Спикерот Талат Џафери деновиве е во Мадрид, каде што учествува на 143. Собрание на Интерпарламентарната унија. Поради тоа денеска не се одржа редовната понеделничка координација на собраниското раководство, кое, според информациите, ќе заседава утре.
Во меѓувреме, за попладне е закажана нова средба Заев-Гаши, откако претседателот на Алтернатива доби „виза“ од партиското раководство да влезе во преговори за приклучување кон владејачкото мнозинство.
Со оглед на ставовите на Алтернатива дека треба да и се даде шанса на стабилноста на државата, во ситуација кога таа е соочена со политичка, економска, здравствена и енергетска криза, се очекува оваа партија да биде конструктивна при обезбедувањето на кворум за почеток на собраниските седница и за гласање, независно од тоа кога и како би завршиле преговорите за нејзино приклучување кон мнозинството.
По 31 октомври, кога се одржа вториот изборен круг, Собранието се состана единствено на 5 ноември, кога беа верификувани мандатите на новите пратеници, кои дојдоа на местата на новоизбраните градоначалници во неколку општини. Истата вечер опозицијата ја најави иницијативата за гласање недоверба на Владата, но обидот за уривање на кабинетот на Зоран Заев испадна неуспешен на 11 ноември. Тогаш поради немање кворум од најмалку 61 пратеник, Собранието не ја ни почна седницата на која требаше да се расправа за доверба на Владата.
Во овој меѓупериод, во Собранието единствено течеше расправата за буџетот за 2022 година во матичната Комисија за финансирање и буџет, каде што амандманската расправа се очекува да заврши кон крајот на оваа работна седмица.
Буџетот засега не е ставен на дневен ред на 54. пленарна седница, која треба да почне на 9 декември, а на чиј дневен ред има над 40 точки. Сепак, доколку завршат сите процедури, од Собранието велат дека буџетот би можел да биде додаден како прва точка во агендата, така што не би требало да се случи да нема кворум за почнување на седницата, со оглед на тоа што сите политички партии се согласија дека буџетот треба да биде донесен, независно од случувањата во политичката арена.
Ако, пак, буџетот не стигне на дневен ред до 9 декември, тогаш, како што најавуваат од Собранието, ќе биде закажана нова седница, не подоцна од 13 декември, која би траела до пет дена.