Лицето што на вчерашниот протест на ВМРО-ДПМНЕ ја нападна новинарската екипа на Ал Џазира е приведено и против него ќе биде поднесен соодветен поднесок, информираат од Министерството за внатрешни работи.
„На протестот што синоќа го одржа опозициската ВМРО-ДПМНЕ, од страна на непознато лице, новинарката Милка Смилевска и снимателот Јорде Ангеловиќ од медиумот Ал Џaзира биле нападните и попречени во вршење на своите професионални новинарски задачи. Од Министерството за внатрешни работи информираа дека М.С во 18.30 часот пријавила дека на ул. ‘Македонија’, каде што се одвивал протест, а таа била работно ангажирана како новинар, додека разговарала со едно од лицата што учествувале на протестот, дошол А.И. (41) од Скопје и замавнувал со рацете, при што и го турнал микрофонот. А.И. е приведен во полициска станица и по документирање на случајот ќе следува соодветен поднесок“,
се вели во соопштението на МВР.
Здружението на новинари на Македонија (ЗНМ) и Самостојниот синдикат на новинари и медиумски работници (ССНМ) го осудија нападот на новинарската екипа и побараа од МВР да го санкционира напаѓачот за кој има и јавно достапна снимка од настанот.
Со осуда излезе и Агенцијата за аудио и аудиовиозуелни медиумски услуги (АВМУ), која нагласи дека ваквите појави претставуваат загрозување на слободата на изразување и на правото на информирање на јавноста.