Министерот за внатрешни работи Наќе Чулев потврди дека ваков настан е забележан во билтенот на МВР, но не сакаше да навлегува во политичката припадност на осомничените
Претседателот на општинскиот комитет на ВМРО-ДПМНЕ во Могила, Оливер Ристевски, на 11 овој месец бил затекнат како со неколкумина краде дрва од шума. Настанот се случил во 13:30 часот кога во сила беше полицискиот час.
Настанот го потврди денеска и министерот за внатрешни работи Наќе Чулев, кој рече дека тоа е заведено во полицискиот билтен. Чулев потенцира дека не сака да навлегува во политичката припадност на осомничените бидејќи, како што рече, секој што сторил прекршок ќе одговара.
Во билтенот на МВР од 12 април има информација дека на 11.4.2020 во 13:30 часот вработен во шумска полиција пријави дека од с. Древеник кон с. Долно Српци се движеле неколку трактори натоварени со дрва, кои не застанеле на даден знак од страна на шумарот во тоа подрачје.
Шумарот ги затекнал лицата О.Р. (44), К.С. (54), Г.С. (30), тројцата од Долно Српци и М.И. (65) од Прилеп во атар на с. Древеник, каде што ги влечеле исечените стебла и таму ги собирале за потоа да ги пренесуваат. Тие не поседувале соодветна дозвола за движење за време на мерката за забрана на движење, поради што биле лишени од слобода во 15:30 и против нив ќе биде поднесен соодветен поднесок, соопштува МВР во билтенот.