Ниту едно од лицата што биле повикани на информативен разговор во станица, како што велат од МВР, не посочило конкретен, потврден или веродостоен извор кој би ги поткрепил тврдењата за загадување на водата во Скопје. Сите рекле дека информациите ги споделиле откако претходно виделе слична објава на социјалните мрежи
Вкупно 13 лица досега се повикани на информативен разговор во полиција во врска со лажните наводи кои вчера се проширија на социјалните мрежи – дека водата во Скопје е небезбедна и загадена со ешерихија коли – информираат вечерва од Министерството за внатрешни работи (МВР).
„Со лицата е извршен службен разговор, при што сите се изјасниле дека информациите ги објавиле или споделиле откако претходно виделе слична објава на социјалните мрежи или слушнале од друго лице. Притоа, никој од нив не посочил конкретен, потврден или веродостоен извор кој би ги поткрепил тврдењата за загадување на водата“,
велат од МВР.
Оттаму додаваат дека Секторот за компјутерски криминал и дигитална форензика при МВР ќе продолжи да прибира и анализира податоци за да се утврдат сите околности поврзани со настанот, како и начинот на кој информациите првично се појавиле, а понатаму и се прошириле на интернет.
МВР апелира граѓаните да не споделуваат непроверени информации и да се информираат од официјални и релевантни извори бидејќи, како што велат, ширењето дезинформации, особено за прашања поврзани со здравјето и безбедноста на граѓаните, може да предизвикаат неоправдана паника и вознемиреност во јавноста.
На социјалните мрежи вчера се појавија информации за наводно присуство на ешерихија коли во водата од скопскиот водовод, што предизвика паника кај граѓаните. Градоначалникот на Град Скопје, Орце Ѓорѓиевски, подоцна во текот на денот ги отфрли наводите како лажни и на заедничка прес-конференција со претставници на ЈП „Водовод и канализација“ им порача на скопјани да бидат спокојни бидејќи пијат безбедна вода.