Ако нема консензус за датумот за избори, ќе испратиме порака дека сме нефункционална демократија, вели кандидатот за пратеник од ВМРО-ДПМНЕ, Тимчо Муцунски, во вечерашното гостување на „Патот кон“ на Алсат.
Според него, датумот за избори треба да се одреди на истиот начин на којшто истите беа и одложени.
„Повеќе од потребно е да се воспостави консензус. Не е наше да лицитираме со датуми за избори, наше е да веруваме дека ќе надвладее една култура на компромис во нашето општество. И дека на начинот на којшто се договорија изборите на 12 април, на начинот на којшто се одложија изборите заради појавата на пандемијата, на еден ист таков начин сите политички субјекти ќе се однесуваат разумно“,
рече Муцунски.
Според него, не треба да има непромислени потези, кои може да влијаат негативно на евроинтеграциите и дополнително да создадат нова политичка и уставна криза.
Говорејќи околу можниот датум за изборите, Муцунски смета дека тие треба да се одржат до крајот на летото, но притоа да се внимава гласачите да имаат чувство на безбедност за сопственото здравје.
Муцунски, кој е секретар за меѓународна соработка на ВМРО-ДПМНЕ, е на втората позиција на кандидатската листа на неговата партија во изборната единица 1, веднаш зад носителката Гордана Силјановска-Давкова.