Додека Богдановиќ тврди дека дрвјата се отстрануваат затоа што биле стари, болни и со скапани корени, за ВМРО-ДПМНЕ ова образложение е срамно и вели дека се отстранува еден од најубавите дрвореди во главниот град
Екипи на ЈП „Паркови и зеленило“ денеска сечат 13 дрвја на улицата „Орце Николов“ во центарот на Скопје, на потегот од раскрсницата со улица „Ленинова“ до раскрсницата со улица „Рузвелтова“.
Градоначалникот на Центар, Саша Богдановиќ, објави на Фејсбук дека дрвјата што се отстрануваат биле стари и болни, со скапани стебла, чии гранки, како што вели, удираат во станбените објекти што се наоѓаат на улицата и претставуваат опасност за минувачите.
„Отстранетите дрвја наскоро ќе бидат заменети со нови, висококвалитетни садници од видот јавор, кои од наесен дополнително ќе го красат новиот лик на улицата ’Орце Николов’“,
најави Богрдаовиќ.
*На мултимедијалната алатка погледнете како изгледаше улицата „Орце Николов“ пред денешната сеча на дрвјата. Со движење на маусот лево-десно ќе ја забележите споредбата.
Од опозициската ВМРО-ДПМНЕ, пак, реагираат дека Богдановиќ и скопскиот градоначалник Петре Шилегов решиле да го уништат и еден од најубавите дрвореди во Скопје, „со срамно образложение дека дрвјата биле стари и болни“.
„Шилегов, Богдановиќ и Зоран Заев, на 15 мај имаа прес конференција на улицата ’Орце Николов’ за некаква реконструкција на само еден крак. Зборуваа за некаква нивна заложба за поубаво и поурбано Скопје, а после неполн месец од таа нивна прес-конференција, денес скопјани се вознемирија од глетката. Отстранети се 13 дрвја. Граѓаните добија ветување од градските власти дека нема да биде исечено ниту едно дрво. Но, еве го резултатот од нивните ветувања. Дали староста и пропаѓањето на дрвјата ја ‘откривате’ баш тогаш кога вршите реконструкции или проширувања улици“,
рече Марија Митева, портпаролка на ВМРО-ДПМНЕ.
