Тоа што црквата е признаена под името „Охридска“, според МПЦ-ОА, се потврдува вековниот црковен континуитет
Најсрдечна благодарност до вселенскиот патријарх Вартоломеј денеска изразија од Светиот архијерејски синод (САС) на Македонската православна црква-Охридска архиепископија (МПЦ-ОА) за вчерашната одлука на Вселенската патријаршија да ја признае црковната јерархија предводена од архиепископот Стефан за канонска и валидна во сеправославниот свет.
Тоа што црквата е признаена под името „Охридска“, според МПЦ-ОА, се потврдува вековниот црковен континуитет.
Од црквата најавуваат и дека ќе ги продолжат разговорите со Српската православна црква (СПЦ) до конечно уредување на статусот на македонската црква.
„Истовремено ја известуваме јавноста дека продолжуваат разговорите со Српската православна црква до уредувањето на конечниот статус на нашата Црква, како и по препорака на Цариградската патријаршија, која во рамките на светоканонскиот чин и црковно предание треба да се уредат управните прашања помеѓу двете цркви“,
се наведува во соопштението од САС на МПЦ – ОА по вонредната синодска седница одржана денеска.
Вчера од Вселенската патријаршија исто така ја повикаа СПЦ да ги уреди управните прашања што ги има со нашата црква во рамки на светоканонскиот чин и црковното предание.
Одлуката на Вселенската патријаршија за признавање на Охридската архиепископија за канонска вчера беше оценета како историски чекор кој ќе води кон автокефалност.
Томос за автокефалност, како што веќе пишувавме, може да донесе само Вселенската патријаршија, без разлика дали другите православни цркви, како Српската или Руската, се согласуваат или не.
*Повеќе вести поврзани со темата:
- Вселенската патријаршија ја призна нашата црква Охридска архиепископија за канонска
- Веќе не сме расколници: Како понатаму до автокефалност на Охридска архиепископија?
- Ковачевски: Одлуката на Вселенската Патријаршија е најважниот чекор, нашата црква е во заедница со сите православни цркви
- Мицкоски: Признавањето на Охридската архиепископија е потврда и за идентитетот на македонскиот народ
- Реакција од Москва: Признаваме само канонски права на Српската црква во Македонија
- Реакции во Грција по одлуката на Вселенската патријаршија: Крај на повеќегодишната перипетија на шизматичката црква, која се врати во рамките на канонската православна црква
- Средба на Ковачевски со г.г. Стефан: Историска одлука и долгоочекувано вековно признание за постоењето на МПЦ, наследничка на древната ОА