Во Општина Тетово, од страна на просветните инспектори, додаваат од МОН, констатирани се многубројни неправилности, особено при избори и именувања на директори и тоа во седум општински основни и средни училишта, за што биле давани насоки за постапување и поведувани се соодветни постапки
Според Министерството за образование и наука (МОН), а врз основа на контролите извршени од Државниот просветен инспекторат, Тетово е општина која најлошо ги менаџира своите надлежности во областа на образованието.
Просветните инспектори, како што велат од МОН, изминатите неколку месеци извршиле контроли над работата на основните и средните училишта во државата. Во Општина Тетово, од страна на просветните инспектори, додаваат од МОН, констатирани се многубројни неправилности, особено при избори и именувања на директори и тоа во седум општински основни и средни училишта, за што биле давани насоки за постапување и поведувани се соодветни постапки.
Во соопштението, кое Министерството го испрати денеска, се наведува дека тоа е резултат на несовесно работење на градоначалникот кој, како што велат, наместо на квалитетот на наставата и интересите на учениците, фокусиран е на политички игри кои ги спроведува токму преку образовните установи.
„Во три основни училишта – ‘Истикбал’, ‘Ѓерѓ Кастриот Скендербеу’ во Порој и ‘Беса’ во Мала Речица, именувани се директори кои не ги исполнуваат законските услови за извршување на функцијата. Двајца од нив (во ‘Истикбал’ и ‘Беса’), исто како и во гимназијата ‘7ми Март’, се назначени и без да се спроведе оглас за избор на директор“,
се наведува во денешното соопштение од МОН.
Оттаму наведуваат и дека во средното училиште „8-ми септември“ не е распишан оглас за избор на директор три месеци пред истекот на мандатот на актуелниот директор на училиштето, како што наложува законот, додека за гимназијата „Кирил Пејчиновиќ“, велат дека противзаконски е разрешен директорот и не е постапено согласно насоките од записникот на просветните инспектори при констатирањето на прекршокот, што пак е утврдено за време на контролниот надзор.
Најнов случај, велат од МОН, на констатирана нерегуларност е обидот на директорката на ОУ „Лирија“ за преземање на вработени од други институции со лажна изјава, за што, како што велат, биле известени надлежните органи и институции за понатамошно постапување.
„Законите важат подеднакво за сите и мора да се почитуваат. Раководството на општина Тетово е свесно за прекршоците кои ги има направено и залудни се обидите да се даде политички контекст на реакциите на институциите и на голем дел од тетовските граѓани. Никој не е над законот и за непочитувањето треба да знае дека сноси одговорности и има последици“,
се додава во соопштението од МОН.