Сугестиите и предлозите треба да се достават, како што велат од МОН, најдоцна до 31 август
Од денеска заедно со Бирото за развој во образованието (БРО) почнува јавната консултација за наставните програми од седмо до деветто одделение, со цел оние што се веќе изработени да се унапредат, а новите кои треба да се подготват да ги содржат сугестиите, особено на наставниците практичари, чие мислење е најважно во процесот на обликување на воспитно-образовниот систем, велат од Министерството за образование и наука (МОН).
Оттаму информираат дека сите чинители во воспитно-образовниот процес можат да дадат свои сугестии за унапредување на постојните наставни програми за седмо и осмо одделение кои се веќе изработени и да учествуваат во изработка на новите за деветто одделение преку електронските адреси: [email protected], [email protected] и [email protected].
Сугестиите и предлозите треба да се достават, како што велат од МОН, најдоцна до 31 август.
„Новата влада ја одложи имплементацијата на Концепцијата за основно образование во седмо, осмо и деветто одделение, поради многубројните реакции во јавноста дека интегрирањето на предмети ја отежнува реализацијата на наставата, но и на оценувањето, создавајќи конфузност и кај наставниците и кај учениците. Незадоволството од нискиот квалитет на воспитно-образовниот процес иницира промени, кои неопходно е да бидат креирани преку поширок консензус“,
се вели во соопштението од МОН.
Во интерес на транспарентноста на процесот, МОН и БРО ќе ги споделуваат пристигнатите сугестии, а за сублимирањето и креирање заклучоци ќе се дискутира на јавен настан.
Надградените, односно новите наставни програми ќе се воведуваат етапно, во 2025 година во седмо, 2026 година во осмо и во 2027 година во деветто одделение.