Во кругот на Клиниката за инфективни болести е поставена мобилната болница за прием и третман на пациенти заболени од ковид-19, која ќе може да се користи од следната недела.
Во неа ќе има 130 кревети и соодветни услови, тоалети и тушеви.
Мобилната болница е поврзана со Инфективната клиника и ќе го надополни нејзиниот капацитет. Во нејзиното поставување, кое траеше неполни седум дена, беа вклучени Град Скопје, Министерството за здравство и Министерството за одбрана.
Со неа дополнително се зголемуваат капацитетите за хоспитализација на заболените од ковид-19.
Мобилната болница е поставена на просторот, каде што беа бараките на поранешниот студентски дом Медицинар, кои Град Скопје ги урна и го уреди просторот.
Капацитет од над 1 000 кревети за третман за заболени од ковид-19
Вкупно на располагање на здравствениот систем се повеќе од 1 000 болнички кревети за хоспитализирање на пациенти со коронавирус и тоа во Клиниката за инфективни болести со дополнителните капацитети, болницата „8 Септември“, инфективните одделенија во Штип, Гостивар и Велес, Институтот за белодробни заболувања во Козле, депандансот на Министерството за труд и социјална политика во Демир Капија, како и понудените капацитети од приватните болници.
Клиниката за инфективни болести заедно со дополнителниот капацитет за прием на тешко и средно-тешко болни пациенти со коронавирус располага со 250 болнички кревети, а со близу 400 кревети располага болницата „8 Септември“ во Скопје.
Во моментов на Клиниката за инфективни болести се лекуваат 59 пациенти, што претставува една четвртина од расположливите капацитети само на оваа локација.
Локацијата каде што е поставена мобилната болница денеска ја посетија вицепремиерката и министерка за одбрана Радмила Шекеринска, министерот за здравство Венко Филипче и градоначалникот на Град Скопје, Петре Шилегов.
„Ова е место кое одлучивме дека е најдобро да биде место каде ќе има доволен број кревети, многу поголем од сега актуелниот, заради тоа што тука е центарот на експертизата, специјалистите по инфективна медицина, медицинските сестри, вклучително и резервниот тим од другите клиники кој ротира како поддршка на Клиниката и на вработените кои имаат соодветен распоред на работа, рече Филипче“,
изјави министерот Филипче.