СВР Охрид соопшти дека се работи за 23-годишен битолчанец за кого постои сомнение оти сторил кривично дело тешка телесна повреда. Ќе биде задржан во станица, по што ќе биде предаден на надлежното јавно обвинителство
Бугарските медиуми вчера јавија дека првиот осомничен напаѓач на Пендиков, против кого беше поднесено обвинение и кому му беше одредена мерка притвор, е пуштен на слобода, но дека му е одземен пасошот. За него веќе е закажано и првото судско рочиште што треба да се одржи на 28 февруари
Охридската полиција вчера привела млад битолчанец, кој е вториот осомничен за нападот на секретарот на бугарскиот клуб „Цар Борис Трети“, Христијан Пендиков, кој се случи на 19 јануари годинава пред кафе-бар во Охрид.
Според соопштението што СВР Охрид го испрати до медиумите, се работи за 23-годишен битолчанец со иницијали Б.А. за кого постои сомнение оти сторил кривично дело тешка телесна повреда.
„Тој беше баран по централна потерница поради постоење основи на сомнение за сторено кривично дело тешка телесна повреда по член 131 од Кривичниот законик. Тој е задржан во полициска станица и ќе биде предаден на надлежното ОЈО“,
се вели во соопштението на СВР Охрид.
Бугарската непрофитна организација Фондација „Македонија“, која се декларира како бугарска културна и образовна организација, денеска на својот фејсбук-профил објави дека вториот напаѓач на Пендиков, извесен Борче Ангелов, синоќа сам ѝ се предал на охридската полиција.
„Доцна синоќа вториот напаѓач над Христијан ѝ се предаде на охридската полиција. Станува збор за Борче Ангелов од Битола кој се соочува со мерка за апсење која нема да се избегне освен ако охридскиот суд не одлучи да го ослободи, како што утврдија за првиот напаѓач Илија Спасески. Има и трет напаѓач, не знаеме кој е и не знаеме дали охридската полиција го бара“,
се вели во објавата на Фондацијата „Македонија“.
Бугарските медиуми вчера јавија дека првиот осомничен напаѓач на Пендиков, против кого беше поднесено обвинение и кому му беше одредена мерка притвор, е пуштен на слобода, но дека му е одземен пасошот. Тој, инаку, е и бугарски државјанин.
На почетокот на февруари охридското обвинителство поднесе обвинение против првиот осомничен напаѓач на секретарот на бугарскиот клуб. Дваесет и четиригодишниот охриѓанец, против кого беше поднесено обвинението, како што информира тогаш од Обвинителството, е обвинет дека заедно со уште едно лице на Пендиков му нанел тешки телесни повреди од омраза поради неговата националната и етничката припадност.
Првото рочиште против напаѓачот над секретарот на бугарскиот клуб во Охрид, Судот во Охрид го закажа за 28 февруари. Процесот ќе го води судијата Бојан Мартиноски, а на напаѓачот ќе му се суди поради нанесување тешки телесни повреди поради омраза (национална и етничка припадност).