Во медиумите се достапни фотографии на кои се гледа како претходната министерка за труд, а сега вицепремиерка држи прес-конференција пред пано со новото уставно име Република Северна Македонија. Дополнителната заменик-министерка Шкријељ вели дека паното пред кое говореше техничката министерка Мизрахи не е во употреба од стапувањето на сила на уставните амандмани
Техничката министерка за труд и социјална политика Рашела Мизрахи се огласи денеска првпат по случајот со враќањето на таблата со старото уставно име на државата, тврдејќи декa пaното, кое предизвика и протестна нота од Грција, го наследила од нејзината претходничка Мила Царовска и дека не постои друго пано во Министерството. Наспроти тоа, во медиумите може да се најдат фотографии на кои се гледа како Царовска, која сега е вицепремиерка во техничката влада, во последната година, давала изјави пред табла со новото уставно име Република Северна Македонија.
Мизрахи денеска во Крушево изјави дека таблата со старото уставно име на нашата земја, поставена во Министерството, е наследена. Како што рече, не постои стара и нова, туку само една табла.
„Јас не ја игнорирам реалноста, но нема да дозволам создавање на нова реалност. Демократско право, но и морална обврска на секој граѓанин е кога ќе види неправда и да реагира по истата. Таблата е наследена и не постои стара и нова табла. Постои само една табла во Министерството за труд и социјална политика“,
рече Мизрахи.
Мизрахи додаде оти треба да и заблагодари на вицепремиерката Царовска „поради тоа што не ја сменила таблата и со тоа длабоко во себе препознала дека ова е Република Македонија и ова е македонски народ“.
Шкријељ: Во МТСП има и пано за поддршка на ЛГБТИ-заедницата
Но, дополнителната заменик-министерка Санела Шкријељ, која беше шефица на кабинетот на министерката Царовска, за „360 степени“ вели дека во Министерството за труд и социјална политика има останато и други табли со старото уставно име на државата. Ама тие, вели, не се во употреба од стапувањето на сила на Преспанскиот договор, односно на уставните амандмани.
„Во Министерството за труд и социјална политика ги има сите услови за одржување прес-конференции и тоа во согласност со Уставот. Во Министерството има и други стари табли со старото име на државата, ама тие не се во употреба по промената на Уставот. Мизрахи најде една од тие табли и реши токму пред неа да дава изјава“,
вели Шкријељ.
Таа смета дека техничката министерка за труд и социјална политика, со изјавата дека таблата е наследена, само се обидува да се извади, бидејќи, како што оценува, не очекувала дека случајот ќе отиде толку далеку.
„Во Министерството има и други стари табли. Има, на пример, табла од кампањата ‘Едно општесво за сите’ или за поддршка на ЛГБТИ-заедницата. Мизрахи можеше да застане и пред некоја од овие табли и да дава изјава, ама таа ја одбра таблата со старото име на државата“,
вели Шкријељ.
Шефот на дипломатијата Никола Димитров побара денеска политичка одговорност од Мизрахи за загрозување на евроатлантските процеси на државата. Предложи нејзино разрешување од функцијата поради прекршување на Уставот, доколку, како што рече, не почне да го употребува новото име на државата. Димитров посочи и на можна кривична одговорност на техничката министерка, поради злоопотреба на службената положба и прекршување на Уставот. Тој информира и дека Грција доставила протестна нота поради гестот на техничката министерка, посочувајќи и на случаи кога техничкиот министер за внатрешни работи, исто така, постапувал спротивно на Преспанскиот договор.
Влада: Не реагираме поради Грција, туку поради кршење на Уставот
Од владата, пак, велат дека не реагираат поради нотата од Грција, зашто такви реаакции од грчка страна имало и во изминатиот период и за други случаи. Главната реакција, како што наведуваат, е поради тоа што член на владата директно го прекршува Уставот.
Од ВМРО-ДПМНЕ досега не се огласија за случајот со министерката од нивниот табор. Коментар вчера избегна и партискиот лидер Христијан Мицкоски, посочувајќи дека за тоа треба да се праша Мизрахи. Техничкиот премиер Оливер Спасовски денеска даде изјава за законот за ЈО, ама не спомна дали е можно да предложи разрешување на министерката за труд и социјална политика, за што конечната одлука ја носи парламентот, со најмалку 61 глас.