За идејата на францускиот претседател за формирање Европска политичка заедница и на Шарл Мишел за Европска геополитичка заедница, Мицкоски вели дека тоа е стар предлог на Франција, а ново е што владата на Ковачевски не дава отпор. Тој смета дека Владата во Македонија не смее да се согласува на „утешителни награди кои служат како алтернатива на Европската Унија“
Активната блокада во парламентот ќе продолжи и нема да глумиме нормализација, затоа што и реалноста што ја живееме не е нормална, вели лидерот на ВМРО-ДПМНЕ, Христијан Мицкоски, во интервју за Дојче веле на македонски јазик.
„Ако прашањето е дали протестот и активната блокада е нужност, јас ќе ви кажам дека ќе бев посреќен доколку Ковачевски прифатеше дијалог со опозицијата, ако покажеше подготвеност за разговор за решенија кои му ги понудивме преку тимовите во четири клучни области, и ако сето тоа да го проверевме пред граѓаните на избори. Неговото одбивање предизвика реакција преточена во активна блокада, засилена со голем граѓански протест, каде ќе порачаме дека премногу е од сѐ што досега видовме од оваа власт, дека молкот не е опција и дека ие време за промени кои ќе донесат иднина. Не сум човек кој импровизира и сум човек кој сака да биде точен. Не сум човек кој прибегнува кон радикални методи, но понекогаш заострувањето на дејствувањето е нужност, кога власта има целосно отсуство на разум. Ние тргнавме во рушење на оваа власт затоа што изборите се решение на проблемите кои стануваат преголеми и сеприсутни. Активната блокада во парламентот ќе продолжи и нема да глумиме нормализација, затоа што и реалноста која ја живееме не е нормална“,
вели Мицкоски.
За датумот 18 јуни, вели дека е одбран за да биде меѓник помеѓу првиот и вториот дел од нивните активности, кои најавува дека ќе бидат континуирани во текот на летото, а воедно, тоа е на само неколку дена пред самитот на Советот на ЕУ, каде што сѐ уште не се знае каков резултат може да се очекува, затоа што, како што вели, опозицијата се држи во целосен информативен мрак од страна на власта.
Во интервјуто тој вели дека со премиерот Димитар Ковачевски сега нема никаков контакт, што според Мицкоски е доказ дека Ковачевски нема демократски капацитет.
„За комуникацијата со Ковачевски на почетокот беше информирана јавноста, и надвор од таа комуникација досега немаме никаков контакт. Колку и чудно да изгледа, и покрај сите наши разлики и спротивставени гледишта, имавме нормална комуникација и со еден Зоран Заев, без оглед што договореното од таквата комуникација во најголема мера не се исполнуваше потоа. Но, сметам дека е нормално два политички субјекта, одговорни за политичката иднина, да имаат минимум комуникација. Отсуството на контакт кажува дека Ковачевски нема демократски капацитет и на тој начин ја штити неспособноста на Владата, која е евидентна“,
вели Мицкоски.
Тој не сака да го прогнозира исходот од разговорите меѓу властите во Скопје и Софија, туку апелира на, како што вели, висока свесност и спречување на нова национална катастрофа за Македонија.
„Зрела држава мора да побара од Бугарија писмени гаранции за идентитетот, јазикот но и обврска дека Бугарија нема да нѐ блокира во понатамошниот пат на Македонија кон Европската Унија. Жалам, искрено жалам, што отсуствува мудрост од македонска страна. Она што требаше да биде македонска позиција со барање за писмени гаранции, станува бугарска позиција и сега гледам дека тоа го говори Радев. И тоа е пропуштена шанса за Македонија. Едноставно, или се нема знаење, или сервилноста е преголема од страна на Владата во Македонија. Не сме известени за никакви детали, но она што го барам од македонската влада е да води сметка за националните и државни интереси, и ниту еден договор спротивен на националните интереси нема да добие поддршка од ВМРО-ДПМНЕ“,
вели Мицкоски и додава дека тие како партија нема да го поддржат секој договор што ќе биде постигнат со Бугарија и власта ќе мора да го елаборира секој член и преземена обврска.
За идејата на францускиот претседател за формирање Европска политичка заедница и на Шарл Мишел за Европска геополитичка заедница, Мицкоски вели дека тоа е стар предлог на Франција, а ново е што Владата на Ковачевски не дава отпор. Тој смета дека Владата во Македонија не смее да се согласува на „утешителни награди кои служат како алтернатива на Европската Унија“.
„Тоа претставува изневерување на нашите искрени намери за членство во Унијата. Таквите предлози треба побрзо да се отфрлат, затоа што е преголема нашата инвестиција во Европската Унија. Она што Владата треба да го направи сега во разговорите со Бугарија, е да не дозволи бугарските позиции, кои се максималистички, да станат дел од општата преговарачка рамка која ќе стане услов за секоја идна влада. Моите информации говорат дека во моментот постојат такви обиди на проширување на преговарачката рамка, на што Владата треба да се спротивстави. Доколку сега се попушти, сериозно се разнишува позицијата на државата и се остава багаж за секоја идна влада“,
смета Мицкоски.