Премиерот Христијан Мицкоски вели дека се работи за најголема инвестиција во делот на обновливите извори во регионот од која бенефит ќе имаат 100 илјади македонски семејства кои ќе се снабдуваат со електрична енергија од овие ветерници. Овој тип инвестиција, вели Мицкоски, не само што ќе додаде вредност врз македонскиот БДП туку и значително ќе ги подобри перформансите на локалната економија и економијата на целата држава
Ветерен парк што ќе произведува еден терават електрична енергија и со која ќе се задоволат потребите на околу 100 илјади домаќинства ќе почне да се гради на почетокот на 2026 година и е првиот голем проект што го најавува новата влада предводена од Христијан Мицкоски.
Инвестицијата на „Алказар енерџи“ е вредна над 500 милиони долари. „Алказар енерџи“, според информациите објавени од самата компанија, има седиште во Луксембург, со советодавен тим во Дубаи. Фондот, на чие чело е соосновачот Даниел Калдерон, се фокусира на проекти поврзани со обновлива енергија на пазари во развој во Европа и во Турција.
Ветерниот парк, како што беше посочено на денешната промоција на инвестицијата, ќе има 55 ветерници и ќе се гради меѓу три општини Карбинци, Штип и Радовиш. Електричната енергија што ќе се произведува од овие ветерници е приближно 20 отсто од целокупното производство на електрична енергија во земјава.
Во текот на изградбата на ветерниот парк се очекува да бидат отворени 630 нови работни места.
Премиерот Христијан Мицкоски вели дека се работи за најголема инвестиција во делот на обновливите извори во регионот од која бенефит ќе имаат 100 илјади македонски семејства кои ќе се снабдуваат со електрична енергија од овие ветерници. Овој тип инвестиција, вели Мицкоски, не само што ќе додаде вредност врз македонскиот БДП туку и значително ќе ги подобри перформансите на локалната економија и економијата на целата држава.
„Ваквиот почеток на мандатот со ваква инвестиција покажува дека како Влада сме насочени кон проекти што се во интерес на граѓаните. Со завршување на овој проект дури 100-ина илјади македонски семејства ќе може да се снабдуваат со електрична енергија од овие ветерници“,
рече Мицкоски.
Според него, овој проект е значаен од многу аспекти – со него ќе се зајакне значително енергетската независност, што е наша цел, ќе го зголеми обемот на инвестиции и ќе отвори пат за нови инвестиции. Ваков тип инвестиции, вели Мицкоски, покажуваат дека довербата во оваа влада уште на самиот почеток е голема и оти како опозиција работевме и сега како влада само ќе продолжиме да работиме со зајакнато темпо.
Тој додаде дека целта на Владата е земјата да стане енергетски независна во делот на електричната енергија и, според него, тоа може да се реализира со детален план.
„Нашиот став е јасен – Мора да ја направиме енергетски независна. Кога зборувам енергетска независност, мислам енергетски независни од електрична енергија бидејќи нормално е дека електричната енергија не е единствениот енергенс. Тука зборуваме за нафта, за гас итн. Кога зборуваме за енергетски независни, зборуваме за енергетски независни во делот на електричната енергија. И тоа може да се реализира само со детален план за енергетиката каде верувам и знам дека ќе имаме голем напредок“,
рече Мицкоски додавајќи дека планот и луѓето ги имаат и оти останува само да се заврши домашната задача што сами си ја поставиле.
Министерката за енергетика, рударство и минерални суровини Сања Божиновска најави програма за грантови и поволни кредити за 150 илјади домаќинства во еден мандат за сопствениците на приватните куќи и станови.
„Поддршката ќе се однесува на поставување нови енергетски ефикасни фасади, прозорци и врати, исто така и субвенции за граѓаните до 50 проценти од цената за набавка и инсталација на енергетска ефикасна опрема. Домаќинствата ќе имаат можност да го продаваат вишокот од произведената електрична енергија по подобри услови со промена на постоечката регулатива. Предвидуваме и промени на начинот на пресметка за исплата на продадената вишок произведена енергија“,
рече Божиновска.
Денеска пред промоцијата на проектот премиерот Христијан Мицкоски заедно со министерот за транспорт Александар Николоски, министерот за животна средина и просторно планирање Изет Меџити и министерката за енергетика, рударство и минерални суровини Сања Божиновска имаа средба со претставниците од „Алказар енерџи“ на која присутен бил и Даниел Калдерон, соосновач и управувачки партнер на компанијата.