Лидерот на ВМРО-ДПМНЕ, Христијан Мицкоски, ги повика сите политички партии и граѓани кои, како што рече, се залагале за промени и ветинг во судството да излезат на маршот на опозицијата закажан за вечерва во 18 часот од Основното јавно обвинителство до Врховниот суд.
Тој ја посочи аудиоснимката што денеска во обвинителството ја достави Антонио Милошоски, а во која се слуша како Заев зборува за судски одлуки, и порача дека вечерва ќе маршираат за ослободување на правосудниот систем.
„Гледаме и слушаме како се нарачуваат судски одлуки и тоа не од кој било туку од Врховниот суд. Ги повикувам сите оние политички партии што во минатото беа многу гласни за ветинг за промени во судството да застанат вечерва со нас, да ни се придружат и да побараме заеднички оваа неправда којашто се случува еднаш засекогаш да престане и да не дозволиме политичките конвертити од ‘сваровски’ во ‘луј витон-судство’ да диктираат какви ќе бидат судските пресуди и да се манипулира со животите на луѓето“,
изјави Мицкоски.
Мицкоски не откри со кои партии ВМРО-ДПМНЕ преговара за можна предизборна коалиција. На новинарско прашање дали преговараат со движењето Беса, од каде што веќе има сигнали за предизборна коалиција со СДСМ, Мицкоски одговори дека им посакува успешна соработка на двете партии, а по 12 април вели дека сите опции за коалициски преговори се отворени.
„Преговараме со многу политички партии, многу скоро денеска јавноста ќе го знае составот на коалицијата со која ВМРО-ДПМНЕ ќе излезе на изборите“,
вели Мицкоски.
Инаку, со слични пораки за ослободување на судството претходно на марш излезе и СДСМ, веднаш по распуштањето на парламентот. Под мотото „Чекориме за правда“, Заев ги повика судиите и обвинителите, како што рече, да се ослободат и да работат во име на правдата, посочувајќи дека новиот Закон за јавно обвинителство е клучен фактор кој, како што тврди, гарантира судска разрешница за сите постапки започнати од поранешното СЈО.