Антонио Милошоски од ВМРО-ДПМНЕ утрово повторно беше кај шефицата на Обвинителството за гонење организиран криминал и корупција Вилма Русковска за да ѝ достави нови аудиоматеријали и транскрипти на кои се слуша доскорешниот премиер Зоран Заев.
Станува збор за „бомбата“ што тој ја објави во неделата на прес-конференција во партиското седиште, а на која се слуша само гласот на Заев каде што зборува за судски одлуки.
Милошоски рече дека кај Русковска утрово направиле записник и таа му кажала дека снимката ќе се обработи за да се утврди релевантноста. Тој смета дека материјалите се релевантни бидејќи и самиот Заев ги потврдил и, врз основа на тоа што се слуша, неговиот став е дека најмалку што може да се направи е да се отвори предистрага.
„Има разлика помеѓу изјавата што ја даде поранешниот премиер Заев дека се сомнева дека го снимале пратеници со кои соработувал и самиот транскрипт каде што укажувачот напоменува дека разговорот е воден во присуство на други две лица. Едното е опфатено со ‘Рекет’, а другото е н.н. лице. Затоа моето мислење е дека најдобро би било обвинителството да го повика Заев да даде исказ за тоа кој присуствувал на тој разговор, за да можат присутните да бидат и сведоци. Втората опција е да се земат снимки бидејќи, според протоколот, влезот и во Владата и во кабинетот на премиерот се под постојан видеонадзор, од безбедносни причини, така што може со сигурност да се утврди кој бил на разговор на оваа тема во мај 2019 година“,
изјави Милошоски по излезот од Обвинителството.
Тој вели дека не поседува дополнителни материјали и дека тие ги добил од анонимен укажувач, па затоа не сакаше да коментира зошто се објавуваат „бомби“ пред избори.
„Ниту поседувам нешто дополнително ниту можам да влијаам на анонимен укажувач, кој одбрал начин како со овие материјали да ја запознае јавноста“,
рече Милошоски.
Ова е негова втора посета на Обвинителството за гонење организиран криминал и корупција. Тој и минатата недела кај Русковска носеше други аудиоматеријали, исто така од Заев. Тогаш стануваше збор за една снимка што тој ја пушти на седница на собраниската Комисија за европски прашања и за друга што сакаше да ја пушти на пленарна седница, но собранискиот спикер Талат Џафери не му дозволи.