Премиерот се осврна и на состојбите во односите со Бугарија, наведувајќи дека, според неговите информации од билатерални разговори меѓу министрите за надворешни работи на Северна Македонија и Бугарија, состојбата се радикализира
Упати повик до јавноста за обединување околу политиките на Владата во однос на евроинтеграциите и спорот со Бугарија, нагласувајќи дека единството ја зајакнува државата и внатрешно и надворешно
Доколку, како што додаде, се изземе билатералниот спор со Бугарија, земјава ги исполнува останатите обврски и се вбројува меѓу најуспешните држави во регионот во процесот на евроинтеграција
Премиерот Христијан Мицкоски изјави дека со претседателот на Европскиот совет, Антонио Кошта, има изградено искрен однос, но дека постојат разлики во нивните ставови околу одредени прашања поврзани со евроинтегративниот процес на државата. Ова тој го кажа на денешната прес-конференција со министерката за финансии Гордана Димитриеска-Кочоска, одговарајќи на новинарско прашање за ставот на Кошта, соопштен при вчерашната посета на Скопје, дека усвојувањето на договорените уставни измени останува клучен услов за формален почеток на пристапните преговори.
„Со Кошта имаме изградено искрен однос. Тоа не значи дека секогаш се согласуваме. Една од темите околу која не се согласуваме е токму оваа. Нашиот став е јасен и непроменет. Нема цена што ќе нè натера да влеземе во авантура без да знаме дека тоа ќе има извесен крај. Многу пати на граѓаните, но и на политичарите им беа давани ветувања, беа тапкани по рамо дека уште ова треба да се направи, но за жал, ние се наоѓаме на истото место каде што бевме пред 26 години“,
рече Мицкоски на прес-конференцијата на која беа соопштени и економските резултати на Владата.
Премиерот се осврна и на состојбите во односите со Бугарија, наведувајќи дека, според неговите информации од билатерални разговори меѓу министрите за надворешни работи на Северна Македонија и Бугарија, состојбата се радикализира.
„Од информациите што јас ги имам и тоа што ми беше соопштено од билатералната средба меѓу министрите за надворешни работи, односно на нашиот и тој на источниот сосед, сметам дека таму драматично се радикализира состојбата и ова не само што ова не е единствениот услов да влеземе во процесот и да го изодиме до крај, туку напротив, таму работите драматично се радикализираат“,
вели тој.
Според премиерот, процесот не само што не се олеснува, туку дополнително се усложнува, за што ја обвини опозицијата во земјата:
„А причината за тоа е опозицијата кај нас, која за жал не бира средства да ги урива позициите на Владата кога станува збор за одбрана на македонските национални интереси и претставува мекото ткиво на македонскиот национален идентитет“.
Премиерот порача дека Владата има сила да се справи со предизвиците и дома и на надворешен план, оценувајќи дека евроинтегративниот процес е маратон, а не спринт.
„Но, и тоа ќе го издржиме. Имаме доволно сила. И да победиме дома, но и да победуваме надвор. Ние сме подготвени за сето ова. Имаме факти и аргументи, ќе работиме. Ова не е спринт. Ова е маратон. Потребно е стратегија, план, визија. Ова се победува со ум, не со брзање и под притисок“,
кажа премиерот.
Упати повик до јавноста за обединување околу политиките на Владата во однос на евроинтеграциите и спорот со Бугарија, нагласувајќи дека единството ја зајакнува државата и внатрешно и надворешно.
„Ја повикувам македонската јавност да застане и да се обедини околу политиките на Владата за прашањето со интеграциите и спорот со Бугарија. Колку повеќе сме заедно и обединети, толку повеќе сме силни и дома и надвор“,
вели Мицкоски.
Посочи дека оние политичари што претставуваат мекото ткиво на македонскиот идентитет наскоро ќе бидат поразени и минато на политичката сцена во државата.
На дополнително новинарско прашање за предлогот на германскиот канцелар Фридрих Мерц, Мицкоски рече дека не очекува промена на позициите на Софија во однос на спорните прашања со земјава, особено по формирањето на новата бугарска влада.
„Не очекувам од страна на Софија промена на ставот, особено не сега, кога новата влада се наоѓа во таканаречен политички меден месец. За да го пренасочат вниманието од домашните проблеми, ќе се обидат да креираат ваков тип прашања преку кои ќе се претстават како заштитници на нивните национални интереси“,
рече тој.
За разлика од македонската политичка сцена, додаде дека во Бугарија постои единствен став кога станува збор за ова прашање, обвинувајќи ја домашната опозиција дека работи на поткопување на позициите на Владата.
Нагласи дека аргументите на државата пред меѓународната заедница се јасни и засновани на конкретни резултати, особено во делот на исполнувањето на обврските од Планот за раст и Реформската агенда.
„Продолжуваме да испорачуваме реформи. Имаме целосно усогласена надворешна и одбранбена политика со Европската Унија, што претставува дополнителен аргумент во наша корист“,
вели тој.
Потсети и на подготвените документи, меѓу кои и Акцискиот план за малцинства, како и на позитивните оценки што, според него, ги добила државата од претседателот на Европскиот совет, Антонио Кошта.
Според Мицкоски, доколку се изземе билатералниот спор со Бугарија, земјава ги исполнува останатите обврски и се вбројува меѓу најуспешните држави во регионот во процесот на евроинтеграција.
„Ако го изолираме ова без притоа да имаме јасна перспектива, сè останато ние како влада ќе го исполниме и ние сме фронтранери, а не тие што се третираат како замислени фронтранери, односно земји коишто исполнуваат услови и се напред и ја водат групата ‘Западен Балкан 6‘“,
посочи премиерот.
Порача дека целта на актуелната влада е да ги заштити државните интереси и да го надомести изгубеното во изминатите години, повторувајќи дека нема да прифати влегување во процес без јасен план и предвидлив исход.
Претседателот на Европскиот совет, Антонио Кошта, на заедничката прес-конференција во Владата со премиерот Христијан Мицкоски рече дека усвојувањето на договорените уставни измени останува клучен услов за формален почеток на пристапните преговори.
„Усвојувањето на договорените уставни измени останува единствен начин за формално почнување на пристапните преговори. Тоа е единствениот начин за отклучување на целосните придобивки од членството во ЕУ за граѓаните на Северна Македонија, тоа значи Македонците“,
рече тој.
На новинарско прашање дали е прифатлив предлогот на Владата да се дадат гаранции за државата во форма на заклучоци на Европскиот совет за билатералните теми во процесот на проширување, Кошта рече дека исто како што кажал и пред една година, важи и сега, односно дека треба да се испорача она што е договорено.
„Како што кажав и пред една година. Она што е договорено, е договорено. И треба да се испорача она што е договорено и ништо повеќе од она што е договорено. Тоа значи дека она што е договорено во 2022 година треба да се испорача и ништо повеќе од тоа. Освен тоа, се работи за нормалниот процес на проширување, да се отворат и затворат различни поглавја, различни кластери. И преговорите одат чекор по чекор. Тоа е процес што се заснова на заслуги. Тоа е она што го прават и другите земји кандидати“,
кажа Кошта.
Сепак, на дополнително новинарско прашање да даде прецизен одговор дали Европскиот совет може да усвои заклучоци што би претставувале гаранции за Македонија, Кошта не даде директен одговор и истакна дека таква можност би можела да се разгледува откако земјата ќе ги исполни преземените обврски.
„Посакувам што е можно порано Европскиот совет да има услови да донесе вакви заклучоци. Но, за ова, зависи од Северна Македонија да го направи тоа што го договорила во 2022 година“,
вели претседателот на Европскиот совет.
Мицкоски на прес-конференцијата со Кошта повтори дека Македонија останува цврсто определена кон европскиот пат, но дека не бара привилегии или олеснети правила, туку предвидлив и принципиелен процес во кој реформите и резултатите ќе бидат соодветно вреднувани.
Според него, Владата продолжува со спроведување на реформската агенда и посветено работи на европската интеграција.